Rinhlehum SAC ralhraang Ralthuam pawl

SAC ralhraang in Karenni (Kayah) ram ah Raldo PhungDaan pahbalin Siivai Datkhu telhmi ralthuam (chemical and biological weapons) a hmang tiah Demawso PDF in February 1 ah thu an suah.

Doawknak umhran loin SAC ralhraang in January 27 ah Phukpi thawn Demawso khawsung voi 3 a kap ih, an kahnak hmun cu ni 5 hnu ah an zoh saal tikah Zian tlaknak kiangkap a rak kaang lai.

Ni 5 hnu khalah Zian tlaknak a kaang lai

“February 1 ah Zian tlannak kan va lai saal cu a rak kaang/vaam lai. Zian pawl cu an hman pangai 60mm , 120 mm a si lo. A vaam ih a khu a suak hlei ah a khu hiip ngahtu kan ralkap pawl cu mithlitlak, dangza, khuhkhuh, thawthawt harin an um” tiah Demawso PDF ṭuanvonei mipakhat cun a rel.

SAC ralhraang hin Chinram doawknak khalah rinhlehum ralthuam a rak hmang dah zo. Cumicu Mindat doawk ṭum ah a si ih ralhraang ralthuam hmang mi, a khu hiip ngahtu pawl cu lungmit, thawthawt har, mitthli tlak in an um. Cuitlunah miṭhen cu an Hmur/Lei tivek tiang a dum ti a si.

Hivek, siivai datkhu telmi ralthuam (chemical and biological weapons) pawl cu voikhatnak Leitlun ralpi a suak hnuin hman kham thokmi a si.

Cuih tlun ah 1972 le 1993 kum ah datkhu telmi hriamhrei ralthuam thu ah daan thar an tuah bet ih chemical lole biological ralthuam tuahnak bungrua pawl rikhiah nei in khawlkhawm an kham ih hmun khat ihsin hmundang ih kuataw khal an kham cih a si.

Cuvek phungdaan um cingin SAC ralhraang in siivai datkhu telmi ralthuam a hmang cun International community ih ngaipoimawh zetmi raldo phungdaan an pahbal tinak a si ih khihhmuhding fumfe neiin heeknak a um cun hmual nei hremnak an tuar thei a si.

Leave a Reply

Your email address will not be published. Required fields are marked *