Rapthlakza SAC ralhraang thilsual tuah thup mi thu ah Mithiam pawl hmuh dan

AAPP in internet cahmai ih a tar mi ah Kawlram a buai thok hnu February 1 ihsin tuni tiangah SAC ralhraang kut tuar ih thi mipum 800 an luan zo ti a si ih cumi lakah Lu phum ding hman um lo in fahniang sungkhat unau ruak ngahlotu khal an um.

Miruak ṭhenkhat an si le kaileng, cuap, thin tvk sunglam tisa kimlo ih ruak ngahsaltu an um ih cumi thawn pehpar in hmuhdan phunphun a suak.

Miṭhenkhat cun SAC ralhraang in mipi ṭhit nakih an hman mi siding zum a um thu an rel nan NLD party sungtel Dr. Win Naing cun black market ah an zuar sawn mi a si a ti.

Cumicu Press Institute of India hohanak thawn online hmuhtonnak an tuah ṭum ah a relsuak ih “a hrisel mi minung sunglam tisa ngah thei dingin mino an bat hrim. Siat pang lo dingin an lu ah an bat. An ruak phel darh in kaileng, thin tvk sunglam tisa an la mi cu international organ trafficking gangs hnen ah an zuar” a ti.

Human rights activist Phil Robertson cun hitin a rel ve

Mithi ṭhenkhat organ an phorh ti cu thufelfai theih fiang a si. Ziang ruangah an phorh tibelte theih fiang a si lo nan an zur tiih puh ding cun khih hmuh ding pipa a um lo a ti.

Amahcun “Mithi tei` innsang theihternak nei loin an cangvai cu daan a si lo hrimhrim ih hitiih an tuah cu thilsual an tuah mi thuphlo an tum ruangah a si thei.”

“Cun, mithi ruak organ phorh in an zuar ti cu khih hmuh ding pipa a um hrih lo. Ka theih cin ah Myanmar ram ah buaipi harsa zetmi organ thlengnak facility tampi a um lo. Organ thleng duhtu cun Thailand lole Singapore ram an pan thlangpi. Tutiang ahcun thulengvak men lawng a si lai. Asinan khih hmuh ding um in black market ah an zuar ngaingai cun boruak a ti danglam thei” a ti.

Mirangram ih um Myanmar Dr. thiamsang pakhat cun thil cang thei si ko a ti

China cozah in daan pahbal ruangih that tuar thawngtla pawl organ a phorh thu a rak phuang dah nan tu ahcun kan tuah nawn lo an ti.

Asinan, Human rights activists ṭhenkhat cun tu khalah an tuah lai ding rinhleh a um tiah an sim ih daan loin organ thawn pursum tuahnak black market khal China ram ah a tam zet tiah an sim.

Cuvek dimhmun a si ruangah Myanmar ram thawn neih awte ih um China ram ah SAC ralhraang in mihring tisa sunglam (organ) an zuar loding ti kan sim theilo tiah Mirangram ih um Myanmar Dr. thiamsang pakhat cun RFA hnen ah a sim dah a si.

Leave a Reply

Your email address will not be published. Required fields are marked *