Ram hruaitu tiih ruatawtu Min Aung Hlaing a mualpho leh ta

Rampi hruaitu dinhmun in Leitlun mipi hmai ih pholangawtum ringringtu ralhraangbawi Min Aung Hlaing cu mualphonak tumzet in a tlak leh.

Tuini, November 22 ih tuahthokmi ASEAN-CHINA pehzomawnak kum 30 kimnak meeting cu Myanmar ram tel loin an thok mei.

Online Live hmuhtonnak ah China hruaitu Xi Jinping le ASEAN hruaitudang an kim thluh nan Myanmar palai tohkham cu totu umloin a lawng.

Myanmar rampi buainak thu thawn pehpar in Min Aung Hlaing in ASEAN thusuah a thlun duhlo ruangah ASEAN pawlkom sungih a um dah keel lomi hremawknak thawn Min Aung Hlaing an hrem ih, tuṭum hi ASEAN hruaitu pawl in Min Aung Hlaing meeting an sawm tel lonak ṭum hnih nak a si. Cumicu ziin phunphun thawn mitheihpitnak hawl ringringtu ralhraang pawl hrang ah ningzah thlak leh sunnak tumzet a si.

Hivekin, Asian mualpi ih pawlkomtum pakhat a simi ASEAN pawlkom in camkhat hrang pawlkom sungtel pakhat a hnong cu a tuartu hrangah zahthlakzet a si tiah ramkhel mithiam pawl khalin an rel.

ASEAN pawlkompi hi Kawlram cozah ruangah kum 2015 ihsin a thokmi Rakhine Rohingya buainak ṭum ah Leitlun kilkip ih soiselnak nasaten a rak tuar zo.

Tuṭumteh, Rohingya harsatnak an tuar lai vekin Min Aung Hlaing hremnak pe lo in an um pang pei maw tiah mi ih rel an hlawh zet ih, atuah hivekih Min Aung Hlaing hremnak an pe cu Leitlun mipi ih fak an hlawh zet hlei ah hrem tuar Min Aung Hlaing cu leitlun mipi in an diremzet a si.

Leave a Reply

Your email address will not be published. Required fields are marked *