Raltlan pawl zawhmi Lilawn a cat ih Ti sungah mi 6 an tla that

Kalay peng doawknak boruak ah sahimnak hawl ih ralkiantu mipi pawl zawhmi Lilawn a cat ih ti sungah mi 6 an tla that tiah theih a si.

Tuni, April 27 zinglamri ih thil thleng a si ih Chindwin tipi thawn pehawmi Myittha tipi Lilawn an zawh lai fangah a cat ih nauhak telin mi 6 an thi tiah tualsung hrambun media pawl in an tarlang.

“Caan tawi hrang Rua thawn tuahmi Lilawn a si ih mawṭaw cycle thawn an zawh lai fang ah a cat.”

“Doawknak boruak a sosang deuh lai ruangah miruak pawl an sar thei hrih lo” ti`n ramsung media pawl in an tarlang.

Lilawn a cat laifang ah minung ziangzat hrawng an um ti cu tarlang a si lo ih, tidai fenmi ah nauawkkai Nu khal a tel ti`n an sim.

Vanduainak tongtu pawl cu Kalay peng, Si khawmi le Doe Nwe khawmi an si ding zum a um ti`n Zalen thuthang in a tarlang.