Ralthuam lei nak ding paisa kyat ting 200 lenglo a ti cingpeng thluh

Dothlengnak cak thei sin dingin le humkhamawknak hrangah ti`n mipi ralkap pawl in zinkong dangdang dapin ralthuam lei nak ding sumsaw an hawl ih, hmuh sun sumsaw thawn rinsanmi lole puaisa hmangin ralthuam an leiter.

Cuvek lakah paisa tlanpi le paisa ti cingpeng an um ih ralthuam khal ngah lo, paisa fai khal ngah sal cuang lo buainak tong mipi ralkap hmuh ding an um hnihthum thlang.

Tu khalah Sagaing hram bun DRPA (အာဏာရှင်တော်လှန်ရေး ပြည်သူ့တပ်မတော် “Dictatorship Revolution People’s Army- DRPA”) ralkap pawl cun cuvek buainak an tong ih ralthuam khal ngah lo, paisa khal ngah sal cuang loin vansang an lam.

Rinsan zetin ralthuam an lei fial mi cu Panglong University ah Mechanical engineering zir lai Sai Htet Aung tiih kohmi tlangval a si ih kan dung kum 2021, November 23 ah ralthuam lei nak ding kyat ting 140 an pe. Pawlkom dang MGF le K21 ralkap pawl khalin meithal fate lei nak ding kyat ting 60 an pe tel cih ih azaten kyat ting 200 an pe.

Nan, ralthuam an lei termi Sai Htet Aung (a.k.a Lin Htet) cun an tiam aw mi tikcucaan a thleng khalah pehtlaih ti a nei lo.

Cuhnu ah thla 2 an hngak bet nan pehtlaih a theih cuanglo ruangah beidongin Panglong Students Union hnen ah pehtlaih theih dan ding bom an dil.

Panglong Students Union (lailak) khalin March 4 le 30 ni pawl ah simfiahnak tuah dingin thu an than nan a lang suak lo ruangah hminsia cazin ah an ret ih, Panglong University ihsin kumkhua dawinak thu an suah.

Shan State Students Union Network khalin Dothlengnak sumsaw tlanpitu ti`n hmin sia cazin ah an ret ih ramsung University hmuahhmuah ah Tlawngkai pehzom theilo dingin hnong cio dingah dilngennak thu an suah ve.

Cuhleiah Dothlengnak hnaihnok phatsantu ti`n an pom ih kiah dan ding le hremnak pe dingin amahthawn pehpartu pawlkom pawl thawn hna kan ṭuan tlang ding ti`n Shan State Students Union Network khalin thu an suah a si.

Asinan, cuvekin puhawknak menlo a um nan amah Sai Htet Aung cun bumawknak a si lo thu le a lei fial bet mi kiahkhih a si ruangah ralthuam zianghman a ngah lo mi a si sawn thu a rel ve.

Amahcun “mi 2 hnen ihsin ka lei sak hai ṭheu. Paisa cu an mah ka pe thluh. Tuhlan khalah an hnen in voi 4-5 lai ka lei zo. Zarh 2 hrawng lawng a rei ṭheu.”

“Nan, tuṭum cu paisa ka pe hnu ah ka pehtlaih thei nawn lo. Zarh 2 hnu khalah a theih cuang lo. Culai ah keimah le hnaṭuan dingin ramri ah ka feh. Cuih hmun ah internet a theih lo ruangah Tlawng lam ihsin thu an suah mi ziang hman ka thei lo. Nan, Tlawng le pawlkom in thu an suah mi cu ka pa hnen ihsin ka thei sal ih kei mah nih thuhla ka ti felfai ding in ti.”

“Cumi boruak ah paisa ka pek mi mipakhat ka pehtliah thei sal ih kyat ting 40 ka lo pe ding tiah in sim. Cupa kan hawl lai ah DRPA sumkil mipakhat khal a tel. Paisa ka pekmi pakhat sawn cu tubai lawngah an kai ti`n thu ka thei. Kei mah in ṭuanvo ka la mi paisa pawl cu ka lo kuan sal ding ti`n DRPA pawlkom hnen ah ka sim hai zo” tiah a ti.

Nan, DRPA ṭaunvonei mipakhat cun ralthuam a lei fial mi va hawl nakah kan nih kan tel lo ti`n a rel ve ih “kan pawlkom central committee sungtel thawn khal tongawknak tivek an nei lo. Nan, a mah rel mi vekin tuah sak mi cu kan nei ko” a ti.

Panglong Students Union in Sai Htet Aung tong an duh thu, thusuah an tuah veten a pa in a fapa ai ah thu relfiang dingin a tiamkam hai nan, May 10 tiang an hngak hnu ah pehtlaih thei nawn loin an um lala.

Nan, amah Sai Htet Aung cun “culai ah thuhla rel ding ziang hman ka nei lo ruangah ka pehtliah hai lo ih, ralthuam ka lei fial mi pawl sawn cu thuhla felfai relsuak dingin ca ka kuat hai. Cutin ka tuah nak san cu bum ka tuar ti`n ka sim hai cun in rinhlel ding ka phang. Atu thubuai hi cu tikcucaan remcanglo ruangah le theihthiam awklonak malte a um ruangah hivek a thleng mi a si. Tu khalah paisa ṭhenkhat rul sal dingin tawlrelnak a um. Ka neih mi thil pawl zuar in paisa ka pe sal ding” tiah a ti.

Ralthuam leifialtu DRPA lam cun amah kan dawr mi a si ih thuhla ummi cu amah in ṭuan vo a la ṭul tiah an rel ve a si.

Leave a Reply

Your email address will not be published. Required fields are marked *