Ralthuam hrang bawmtuṭha an nei lo ruangah YPDF in khawpi suahsan

Thlanglam Shan ram, Ywangan myone hrambun Ywangan People’s Defense Force cun harsatnak ruangah khua kan suahsan hrih ding ti`n June 9 ah thu an than.

“Tu tikcucaan cu kan mah PDF lawng siloin mipi khal harsat talbuai lai fang a si ih, tu dinhmun ah tuah kan tum mi kan tuahsuak pehzom thei lo ruangah Ywangan khua kan suah san hrih ding” ti`n mipi an sim thei.

YPDF thusuah ahcun harsatnak ruangah khua kan suah san ti`n tarlang a si nan ṭuanvonei mipakhat cun ralhraang donak ralthuam kan nei lo ruangah a si ti`n Mizzima hnen ah a sim.

“Meithal in pek uh, kan nunnak kan hlan ding tisehla, kan nih lam cun nunnak petu an tam tuk zo. Meithal sawn lawng pektu kan nei lo. Curuangah tuvekin atawpkhawk thuthluknak kan tuah mi a si. Peng sung ih um ding ziang ti hman in a cang thiam nawn lo.”

“Culocun ralhraang pawlin in ra nor sehla kan nih lam cun humkhamnak တူမီး meithal malte lawng kan nei thlang. Nunnak sung lak men dinhmun ah kan um thei nawn lo. Asinan, Dothlengnak hrangah ziangtiklai khalah pumpeaw kan hreh lo” ti`n YPDF ṭuanvonei mipakhat cun a rel.

Khawpi cu an suahsan nan YPDF cu Dothlengnak pawlkom pakhat dinhmun in an um tum hrih ih, netahnu ah hi hnak ih thacak sawn in kan kir sal ding tiah mipi an tiamkam ta a si.

Leave a Reply

Your email address will not be published. Required fields are marked *