Ralhraang SAC ralkap in nauhak telin ralkian 35 Urkaang that

SAC ralhraang le KNDF doawknak ruangah beunak hawlin Inn le Lo suahsantu ralkian 30 luan cu ralhraang SAC ralkap pawl in an urkaang that tiah theih a si.

Kayah ramkulh, Hpruso peng ah SAC ralhraang le KNDF doawknak boruak a sosang ih, KNDF in ram haal nak an nei lai ah mawṭaw thawn Urkaang cihmi khawmi pawl ih ruak an hmusuak a si.

“December 24 zaanlam ramhaalnak kan nei lai ah kan hmumi a si. An hmuihmel khal thei thiam theih a si lo ih zohawk a ṭha lo.”

“Zo pawl an si ti kan thei lo tikah, innsang venghnen kaihtuar a theitu lole a hlamtu sungkhat unau an um lawngah kan thei fiang thei ding. Kan thei ciangmi pakhat cu mawṭaw par ah an urkaang that tilawng a si” tiah KNDF ṭuanvonei mipakhat in Kantarawaddy Times hnen ah a sim.

TNA khalin khuami an urkaang thu cu nemhngetnak an nei ih “nauhak le nunau telin khuami 35 an urkaang that. Cuihtlunah kaihtuar khawmi pawl thlah dingih a diltu BGF ralkap 4 khal kutdunglet ṭawn in an that ta” tiah an tarlang.

Mizaanlam ah mithiruak an hmu nak, Moso khua kiangkap ah SAC ralhraang le KNDF pawl nazi 4 sung lai an doawk ih kahdonak ruangah kiangkap khawmi tamzetin Inn le Lo suahsan in beunak an hawl tiah theih a si.

Leave a Reply

Your email address will not be published. Required fields are marked *