Ralhraang tuah mi Union Day ih AA Hriamkai pawl an tel ve nak san “Thudik”

SAC ralhraang sawmnak cohlangin Voi 75nak Union Day nipi ih AA hriamkai pawl an tel ve nak san cu AA ṭuanvonei Khaing Thukha in ciang zetin a rel.

“Phunhnam le kan ram ṭhansoding hi thupibik pakhat ah kan ret mi a si. SAC lam ah kan ṭang tinak si lo in mipi hrang ruatin ramkhelnak kan tuah mi a si” tiah a ti.

February 12 ih tuah mi Union Day le kumkhua daih remdaihnak hrang thu rel khawm dingin SAC ralhraang cun rampumhuap hriamkai pawlkom zate a sawm ih sawmnak cohlangin meeting va kaitu hriamkai/pawlkom 11 an um.

Cupawl lakah ramsung hriamkai pawlkom lakih rinsanum pakhat a si mi AA an telve cu ramsung mipi an mangbang thluh. Ralhraang lam ah AA an kop cun Dothlengnak hrang ruahsanding a mal tivek tiangih ruahnak neitu an um.

Asinan, atu ah AA ṭuanvonei Khaing Thukha cun copawklam siloin ramkhelnak pakhat men a si thu, fiang zetin a rel.

AA sungthu theitu hminthup mipakhat khalin hitin a rel ve. “AA thuken kan thei ciang lo deuh a bang. Mipi le an ralkap hi number 1 ah a rettu an si. Min Aung Hlaing in kut a hlan hmasa ih sawmnak nan cohlang cun nan duh mi kan ti famkim ding an ti.”

“Cutikah caanṭha remcang hmang thiamin an mah thawn pehpartu Thawngtlak pawl thlah dingin an dil ve. Meeting ih mithmai va langter men ah sungnak zianghman an nei lo. Curuangah MAH sawmnak an cohlang a si” a ti.

AA thawn biakremnak an nei vekin SAC ralhraang in AA thawn pehpartu Thawngtlak 64 an suah ih, AA lam khalin meeting kai dingin mi 2 an thlah ve.

Kumkhuadaih remdaihnak phen ih thil um thup ……

Siarbet : Kumkhuadaih remdaihnak phen ih thil um thup ……

SAC ralhraang in Tlangpar hriamkai hmuahhmuah thawn remdaihnak tuah dingin kan dung bai ah kut a hlan hai.

Rampumhuap Tlangpar hriamkai pawl thawn remdaihnak a tuah duh nak san cu mipi ralkap PDF/CDF pawl thianfai zangzang a duh ruangah a si tiah KNU/KNLA ralbawi Saw Mu He in a ti.

“Atu PDF pawl dinhmun cu SAC cozah in a hrang ah ziinbingbo tumzet pakhat a si ti a thei ciang. Curuangah Tlangpar hriamkai pawl thawn remdaihnak kan tuah thei cun PDF thianfai thei dan a zia ding tiah an ruat. Cucu an tumtah mi a si” tiah Karen National Liberation Army (KNLA) Brigade 5 Commander General Saw Mu He cun Kachin hrambun media hnen ah an mah ṭong hmangin a rel.

Atu an dinhmun a derthawng lai fang cu thalak nakah hmangin Tlangpar hriamkai pawl thawn remdaihnak tuah dingah kut a hlan hai ih, cuvek dinhmun thleng lo hai bang seh la remdaihnak simlo kan tawhram rorin hlo ko in do duh ding tiah General Saw Mu He cun SAC tumtahmi cu a rel fiang bet hrih.

Karen National Liberation Army (KNU/KNLA) Brigade 5 Commander General Saw Mu He

Kan ram boruak thlirtu mithiam ṭhenkhat khalin General Saw Mu He hmuhdan an ṭawmpi ih “PDF/CDF pawl raldo an zirh hlei ah SAC ralhraang do in mipi humtu ralkap pawl thawn hmai an nor tlang.”

“Cuvek a si tikah rampumhuap hriamkai zate ṭangkhawmin thazaang neih hmuahhmuah thawn ciilnuaituar an phang ruangah remdaihnak tuah dingin kut an hlan mi a si” tiah ralhraang tumtahmi an pholang a si.

Leave a Reply

Your email address will not be published. Required fields are marked *