Ralhraang thurelnak ah Dr. Ngun Cung Lian hmasabik ah a to ngiarngiar

Yangon : 2022, February 8 ih Ministry of Foreign Affairs tawlrelnak thawn tumtahnei thusimfiah an nei nakah Chin pacang Dr. Ngun Cung Lian a telve.

Kan theih cio bangin Dr. Ngun Cung Lian cu ralhraangbawi MAH cozah thuron a si ih, ralhraang thawn pehzomawtu a si vekin tuṭum meeting ah MAH mithmai ngahnakding thu tawi an relter ve.

Dr. Ngun Cung Lian cun ralhraang siatsuahmi Chin ram dung hoih sanin “2008 Daanhrampi thawn milawin SAC in thuneihnak an lak mi a si ih a sual kan ti thei lo” a ti.

Dr. Andrew Ngun Cung Lian cun 2014 khalah Tatmadaw thawn pehparin hitin a rak rel dah. “Tatmadaw cu zalennak in lak saktu kan pa Bogyoke Aung San din mi a si. Cun, ramkhel buainak cu hriamhrei ralthuam thawn siloin ramkhel feh dan pangaiten a fehpi duhtu an si” a ti.

Dr. Ngun Cung Lian thurelmi thawn pehparin Chin mino pakhat cun hitin a rel

“Rampumhuap hmundang buainak cu tanta hrihin Chinram, Thantlang khawpi an ur kaang mi lawng hmanin mipangai ruahnak a thleng danglam thei nan, suahsemnak Chinram phatsanin mai hrang lawng ruattu ralhraang Kepawk Dr. Ngun Cung Lian sinak cun Chin mino pakhat dinhmun in i ning hangter a si”

Meeting ah UEC sungtel U Khin Maung Oo in 2020 hrilawknak ih vote diklo an ti mi thu pawl le a ra lai ding tikcucaan ih hrilawknak hrang tawlreldan ṭhenkhat a rel.

Police Brig. Gen. Aung Htay Myint in ralhraang tiih a koh mi CRPH, NUG le PDF cangvaihnak ṭhenkhat a rel ve ih “cupawl thapetu le an sungtel pawl cu United Nations Security Council Resolutions phungdaan 2176, 2368, 2050 … tivek pahbal thawn a bangaw” a ti.

2022, February 8 ih thurelfiahnak cu ASEAN thawn kutzakaitlang thei saal nak lamziin an sialmi a si ih, SAC ralhraang in meeting kai dingin Leitlun ramdangdang palai tamzet a sawm nan a hmun ih vasuaktu cu Russia le Japan palai lawng an si.

Leave a Reply

Your email address will not be published. Required fields are marked *