Ralhraang SAC ralbawi korzaal ih an hmumi Sui faute pawl a neitu pek saal tum

Sagaing ramṭhen, Mingin peng ih doawknak hmunram pawl vehvaisaaltu PDF ralkap pawl cun mithi SAC ralbawi korzaal ah sui faute 5 an hmu ih a neitu hnen pek saal an tum a si.

April 29 ah Mingin PDF “Myanmar Defense Force” ralkap pawl in hmunram thianfainak an tuah lai ah ခလရ 87 ralbawi (ဒုတိယဗိုလ်) korzaal ah sui faute pawl an hmu.

“An mah ta a si lo ti cu a ciang rori. Khawi khua ta an fir ti cu kan thei lo. Hmunram thianfainak kan tuah lai ah mithizo ralkap korzaal ah kan hmu mi a si. Mingin humvennak tuahtu ပ.က.ဖ kan pehtlaih zo ih a neitu hnen ap saal dingin kan tawlrel zo. Atu ah cu ṭuanvo neitu pawl in an kol hrih” tiah Myanmar Defense Force spokesperson cun a rel.

Mingin peng ah April thlatawp lam ah ni 5 hrawng PDF le ခလရ 87 ralhraang ralkap pawl an doaw ih ralhraang lam an tuar na ruangah Kani ram lam ah an siipkir saal.

April 25 ah pyosawṭhi telin ralhraang thazaang 200 hrawng in Mingin peng khuate pawl an luhcilh ih inn tampi an urkaang. Khua ṭhenkhat cu khawpumhlum deuh thaw ih kaang mi khal a um.

Inn tampi an ur ruangah umnak nei lo khawmi tampi an um ih, raltlan khawmi pawl cu Myanmar Defense Force in thei tawk suahin bawmnak an pe rero tiah theih a si.

Leave a Reply

Your email address will not be published. Required fields are marked *