Ralhraang ralkap lamṭang pawl Facebook par ah lungawi lo

Kan rampi a buai hnu, ralhraang ralkap mithmai pe in Thuthang, video le cahram tarlang ṭheutu website siseh, social media account pawl Facebook in a phit sak ruangah le ralrin pekawknak a um ṭheu ruangah ralhraang ralkap thuthang pholang ṭheutu media pawl FB par ah an lungawi lo.

Ramsung buainak sosang sin dingin thuthang dik lo le thatawknak zuk/video tivek tarlang ṭheutu media pawl hmuah phit sak cuang loin rampi remdaihnak hrang hmalak duhtu kan ca tar pawl in phit sak ṭheutu thil dik a si lo. Lam ṭan nei in an cangvai tiah FB an soisel.

FB soiseltu lakih langsar cuang media pakhat cu NP News (Neo Politics) timi internet cahmai pakhat a si ih Kawl ca in siseh, mirang ca khalin ralhraang ralkap thuthang an suah ṭheu.

Tu kum sung lawng ah mirangca le kawl ca thawn ngan mi thuthang/cahram amalik 7 an hlon sak zo ih, website ihsin an tarlangmi thuthang ṭhenkhat khal ngah lo dingin an tuah sak mi a um ih, a share sawngtu pawl khal ralrin an pe cih.

“Kawlram cozah hnen ah siah pek loin an um ih, cuti cingin kan ram buainak thu ih an hrolh aw ve cu thil cang thei a si lo. Adikmi a si lo. Abikin kan mah NP News hi in bat cuang in kan thei ih, kan nih lam cun ramsung remdaihnak hrang ruatin thuthang dik le lam ṭan nei loin ca kan suah ṭheu” tiah NP News ṭuanvonei pakhat in a rel.

An mah neih mi Social platform par ih thu an nei cu ti theih dang a um lo nan, FB hmangtu Kawlrammi lakah lungrual lonak siseh, huatawknak le remdaihnak tisiatu ah an cang ih kan ram ṭumsuk lam a pan mi khal hi an mah thawn tampi a pehpar aw tiah amahcun a rel bet hrih ih “tuhlan cozah san ih biaknak lam hmuhsuamawknak le kan nunphung ti niam tertu khal hi an mah thotho an si ti Kawlram mipi in kan thei thiam a ṭul zet” a ti.

Technology lam thiamsang tiih tarlangmi nunau pakhat khalin “Himi hi mibur ih tuah mi a si ding. Mibur in report in tuah ruangah, lole Facebook AI, Algorithm ah blacklist ah in ret ruangah a si thei. Mipum 500-600 hrawng ih cangvaihnak a si thei. Cun, Facebook Myanmar policy team ih hnaṭuan pawl khal an tel ding zum a um. Hivekih thil an tuah mi cu an mai` Dun le Daan pawl an mah lala in an pahbal thawn a bangaw. Zalen zetih cangan thei nak le thu rel theinak an suam tinak si ko” tiah a ti.

Thuthang diklo le hram mumal hmuh ding a um lo mi thuthang tivek an thlah darh ruangah ralhraang ralkap thawn pehparmi internet cahmai pawl Facebook in a hlon hlo mi tamzet a um zo ih ramsung mipi theih lar People Media timi khal Facebook ihsin an rak hlon hlo dah zo a si….

Leave a Reply

Your email address will not be published. Required fields are marked *