Ralhraang ralkap in nauno nei lai Nupinu a bur in pawngsual, Naute thawn that cih

Atufang boruak sosang zetnak Magway ramṭhen, Gangaw peng ah ralhraang ralkap in Yaeshin khua luhcilh in fa 2 nei nupinu a bur in an pawng sual ih, amah, a fa pahnih le khawmi 4 an that tiah theih a si.

Thazaang 200 hrawng a si mi ralhraang ralkap rual cu July 4 zaanlam ah Yaeshin khua ah lut in zaankhat an riat ih, kum 22mi nupinu a bur in an pawngsual tiah khawmi pawl in an sim.

Pawngsualtuar nupinu cu kumkhatmi le kumngami fanu pahnih nei a si ih an pawngsual hnu ah a fa le pawl thawn ralhraang ralkap in an that cih. Cuhleiah hawiruallo mipakhat telin khawmi 4 an that bet tiah khawmi pawl cun an rel.

Tualsung PDF ṭuanvonei mipakhat in “Mizaan ah Yaeshin khua ah zaan khat an riat ih mithat mi an an nei hlei ah khawmi pawl kai in Tlawnginn ah an khum ih bomb an kam ta. An mah cu tuzing ah Chaungkhuah lam ah an pok zo. Mizaan ah khawmi 20 lenglo an kai” tiah LNK hnen ah sim ih “khawsung inn 4 an urkaang” a ti.

Tu dinhmun ah ralhraang ralkaprual cu Chaungkhuah ah thlengin mipi ralkap thawn nasaten an doaw laifang a si ih doawknak dinhmun cu theihfiang a si hrih lo.

Boruak a sosang ruangah Gangaw-Kalay ziinpi zawh hrih lo dingin nitlaknaklam tatmaha 7, tatyin 703 in mipi an theihter.

Leave a Reply

Your email address will not be published. Required fields are marked *