Ralhraang ralkap in Kum 79 mi Pitar urkaang that

Sagaing ramṭhen, Shwebo peng, Khin-U myone, TharGaYa khawte cu ralhraang ralkap pawl in June 4 ah an luhcilh ih inn tampi an urkaang rual in kum 79 mi Pitar an urkaang that.

Amah hi cakvak tuklo a si ih ralhraang ralkap in khua inn 70 lenglo an urkaang rual in Pitar Daw Shih khal an urkaang that ti`n Khin-U PDF ṭuanvonei mipakhat in a rel.

“Uico ralhraang ralkap in inn tampi an boh hnu ah inn 70 luan an urkaang. Fang tin Thawnghra luan khal an khaang ih leiletnak bungrua, Caw le ramnung dangdang khal an that” tiah amahcun a rel ih “Khin-U PDF khalin official in thu kan suah zo” a ti.

Mithi hi, ralhraang ralkap urkaang mi thianfainak an tuah lai ah mipi ralkap pawl in an hmusuak mi a si ih, a ruh ro le vutcaam cu ṭhaten an phum ta.

Sagaing ramṭhen, Khin-U myone kiangkap hi ralhraang ralkap in nitinten ralthuamtum thawn an kap ringring ruangah innkaang a tam ih khuapawhpawh rorin hramlak ah sahimnak an hawl tiah theih a si.

Leave a Reply

Your email address will not be published. Required fields are marked *