Ralhraang ralkap in Kum 6 mi naute le a nu le pa kap that

Shan ramkulh, Mong Hsu peng ah khawsung ihsin Khawte lam kir saaltu Sai Thiha tei` innsang cu ralhraang ralkap pawl in Lamzin ah an kap that.

July 18 ah kah that an si ih thuhla felfai zirzoitu The Irrawaddy in an kahnak kiangkap khawmi pawl thu sut in July 20 ah thu felfai an tarlang mi a si.

Naute telin mipathum kah that an si ih innsangpa Sai Thiha, a nupi Nan Seng Lu le an fapa kum 6 mi pawl cu Mong Hsu-Tangyan zinpi, ralhraang ralkap umhmun khuarnak kiang ah an kap that tiah khuami pawl cun an sim.

A kaptu ralhraang ralkap hi Hui Lut khua kiang ih umhmun khuar Light Infantry Battalion 524 ralhraang ralkap si ding ah zum a si ih, Innsangnu le a fapa cu a hmun rori ah thi cih in, innsangpa cu Mong Hsu siizung thlen hnu ah a thi.

Tualsungum khawmi pakhat cun “Mong Hsu ah meithal thawn kah that mi an tam thlang nan zoi pawl cangvaihnak a si ti relfiahnak a um dah lo. Khawmi hrang ah a him lo zet. A tuartu cu khawmi kan si. Kahthatmi an um tikah ṭuanvo latu zohman an um dah lo. Tu khal hi hitin a feh liam men ding” tiah a ti.

Atufang, Mong Hsu peng ah ralhraang ralkap le Shan State Progress Party karlak buainak a sosang ih raltlan khal an tam zet zo.

Ralhraang ralkap in Mong Hsu saklam, Lwel Nai hrambun SSPP ralkap sakhaan ṭhiat dingin thu an pe ih, July 21 netabik ah retin sakhaan ṭhawn ding caan an khiah sak ih, kaphnih karlak boruak a sosang zet tiah theih a si.

Leave a Reply

Your email address will not be published. Required fields are marked *