Ralhraang ralkap in duh tawk ih mipi an that ngam nak san relfiang

Ralhraang ralkap in tuhlan ah siseh, atu ih a cang rero lai mi mipi a burbur ih thahnak le rammi par ah duh tawk ih rapthlakza sualnak an tuah mi pawl cu thilsual an tuahmi par ah hremnak an tuar dah lo mi thawn tampi a pehpar aw ti`n UN palai U Kyaw Moe Tun in a rel.

June 13 ih tuah mi UN General meeting ah cutin a rel mi a si ih, a rel duh san cu UN le leitlun remdaihnak thawn pehparmi pawlkom dangdang pawl in Kawlram thu buai an ngaih sak tawk lo, an hnaṭuan ding mi an ṭuan tawk lo ti`n a sim duh san a si.

U Kyaw Moe Tun cun tu dinhmun ah Myanmar ramsung dinhmun a sia zet lai ih, ralhraang ralkap in a burbur in mi an that hlei ah raltlan tampi um in mipi harsatnak an pe. Cuihtlunah a thuptei` damsung thawngthlak le thih daan tat mi mipum 200 luan an um zo a ti.

“Cuvek cangvaihnak pawl cu human rights pawlkom le rintlak pawlkom pawl in an dem nasa nan, rapthlakza thil sual an tuah mi par ah atakin hremnak an tuar lo ruangah tuvekin an cangvai ngam a si” tiah U Kyaw Moe Tun cun a ti.

Tu dinhmun ah ramsung mipi lungrualnak, rual zetih doletnak, sual an tuah mi par ah leitlunhuap pawlkompi pawl ih hmual neimi hrem peknak, Raltlan le harsa pawl bawmnak tipawl cu atufuang ramsung mipi ih kan ṭulbikmi a si tiah U Kyaw Moe Tun cun a rel bet hrih.

Cuvekpawl atakih cangsuak thei ding cun UN, ASEAN le kan ram hnen pawl ih bawmnak, ramdang thawn ralthuam dawrawknak khap sak, ralhraang pursum tuahnak tivekpawl hmual nei le felfai zetih phit sak kan ṭul ti`n U Kyaw Moe Tun cun a rel a si.

Leave a Reply

Your email address will not be published. Required fields are marked *