Ralhraang khualbuuk ah bomb a puak

Mandalay ramṭhen, Kyaukse khua ih ralhraang Than Shwe inn hlun ah mipi lamṭang K.D.D.F hriamkai pawl in tuzing April 22 ah bomb an puah.

Bomb puahtu Kyaukse District Defense Force – KDDF khalin Than Shwe inn hlun ah bomb pakhat an denglut thu an phuang zo ih, bomb puah lai tiih tarlangmi zuknungtawi khal internet cahmai ah an thlah cih.

KDDF ṭuanvonei mipakhat cun “zinglam nazi 11 hrawngah a si ih mawṭaw cycle thawn bomb kan va puah ta. Sangka kiltu ralhraang 3 an um ih, kan ralkap pawl cu himten an kir thei sal” tiah a ti.

Bomb puak ah mithi an um le umlo cu felfaiin theih a si lo ih bomb a puak hnu reilote ah ralhraang ralkap le palik pawl in lamziin an phit thluh tiah khawmi pawl in an sim.

Kyaukse ih ralhraang Than Shwe inn-hlun cu rampi cozah khualbuuk ah an hmangmi a si ih, kan dung kum 2021, September thla thok lam khalah bomb an rak puah dah zo a si.

Leave a Reply

Your email address will not be published. Required fields are marked *