Ralhraang in a unau an kaih sak thin har ah Lawyer kum no te a that aw

Mandalay ramṭhen, Patheingyi khawmi Lawyer Phyu Phyu Khine cu ralhraang ralkap in a nau le pahnih an kai ruangah thin har in a mahten a that aw.

PDF le Lamzawh duhphorhnak thapetu ti`n ralhraang ralkap in June 8 ah a inn ah an hawl ih, amah an hmu lo ruangah a naupa le a naunu an kai tiah khawmi pawl in a rel.

“Patheingyi, OhnChaw khua ih an inn ah kai dingin an pan ih amah a rak um lo. Inn ih um a naunu le a naupa an vuak velh hnu ah ralkap pawl in an hruai cih”.

“Cumi thu a theih hnu ah thin har in amahten a thataw tiah kan thei. Pangang/hrik that sii a in ih a nunnak a cem” tiah khawmi pakhat cun a rel.

Amahthawn naivaitu hnen ihsin thuthang dongtu LNK media tarlang dan ah Lawyer Phyu Phyu Khine cu mizaan ah Pangang/hrik thatsii a in ti a si.

A that aw tum lai kiangkap naivai pawl in an hmu ih an run tum nan tuni ah a nunnak a cem tiah LNK media cun a tarlang.

Lawyer Phyu Phyu Khine cu kum 29 telawng a si lai ih, khawmi ṭhenkhat cun amah a um nawn lo cun a nau le an thlah sal ding ti zumnak a nei ruangah a that aw mi a si thei ti`n zumnak an nei a si.

Leave a Reply

Your email address will not be published. Required fields are marked *