Ralhraang 200 lenglo in rinlopin PDF sakhaan an siim, Ralthuam tampi lak sak

Sagaing ramṭhen, Myaung peng, Pareinma khua kiang, 27 Revolution Forces PDF sakhaan cu ralhraang thazaang tamzetin an siim ih ralthuam tampi an lak sak.

27 Revolution Forces ralkap pawl hi Pareinma khua kiang ah thla 2 fai umhmun an khua zo ih, May 4 zinglam nazi 5 hrawngah ralhraang ralkap pawl in rinlopin an siim a si.

Mipi ralkap hruaitu mipakhat rel dan ah ralhraang ralkap hi an sakhaan kiangkap an thleng thu cu an thei nan, an zum lo nak hmun ihsin rinlopi siim tuar mi sivekin a rel.

“Keimah rori in itthat loin zaan var ka bawh hai cingin hivek dinhmun kan thleng. Kan zum lo nak lamin in ra nor. Ruah sur remcang hngakin in bawh cia a bang. Hmun 3 rorin in do ih kap nak caan khal kan nei ṭhiṭha man lo. Khua saklam, nitlaknak saklam, nisuahnak saklam ti`n phukpi thawn in kap ih meithal keng ralkap thazaang tamzetin in ra nor.”

“Dunglam in an ra lut ding kan zum nan, kan zum lo nak lam ihsin an ra. Ralhraang hi thazaang 200 hrawng an si ih, thei tawk suahin ralthuam bungrua tampi kan tlanpitum nan kan thazaang kan thlauaw tikah tingaihnak a um lo. Caan a um lo. Kan minung lawng himdamin kan luat thei. Thil tampiman kan sung” tiah 27 Revolution Forces ṭuanvonei mipakhat in Mizzima hnen ah a sim.

Ralhraang in Sakhaan an luhcilh ruangah mawṭaw 3, mawṭaw cycle 23, rek 9 thun theih kuttuah meithal 5, 5.56 cerek hmang cii kuttuah meithal 8, Drone tamzet, AK cerek 4000 le ralthuam dangdang tamzet an sung nan minung himdamten dung an siip thei.

“In kap thok cu zinglam nazi 4:45 hrawng ah si ding. An ra le ra lo duty kan tuah ih thawmvang zianghman a um lo ruangah nazi 4 hrawngah Sakhaan ah kan kir saal.”

“Sakhaan kan thleng saal hnu reilote ah phukpi thawn in kap cih. Kan hruaitu pawl in a cang thei lo in ti ihsin dung kan siip thok. Kan zaten kan him theinak dingah raldothiam 7 hrangin ralhraang pawl in kham sak ih,, cutin a sangsangten kan suak thei” tiah 27 Revolution Forces ṭuanvonei mipakhat cun a rel ih “remṭhatṭul tlasamnak tampi kan nei” a ti.

Ralhraang SAC ralkap cu tukhalah Sakhaan an lak nak ah an um lai ti a si ih khawmi kaihkhihmi le that tuar khal an um ih, raltlan tampi an um tiah amahcun a rel bet hrih.

Leave a Reply

Your email address will not be published. Required fields are marked *