Ralbawihlun Thein Aung thih thu cu SAC ralhraang in a ngaihven hleicecuang

Mytel company ih CFO (Chief Finance Officer) Thein Aung that tuar thu cu SAC ralhraang in nasaten a ngaihven ih kah that a tuarnak an inn kiangkap ih CCTV zaten an lakhawm thluh tiah theih a si.

An kap hlante ih CCTV zukngahmi video tawi online ah a puutdarh tiah thuthang a suak ih Thein Aung kapthattu tiih tarlangmi cycle tolai mipathum CCTV screenshot zuk khal online ah a darh.

Ralhraang pawl in thuhla an ngaihven nasatuk ruangah le, CCTV video le screenshot a darh ruangah hih buainak thawn a peppartu hmuahhmuah cu hmunhim ah tlan lohli dingin le ralring zetih um cio dingin online ah thuthanawknak hmuh ding a tam zet.

Ralbawihlun Thein Aung an that dan

November 4 zing ih a nupi thawn an lengsuak lai ah meithal kap an tuar. U Thein Aung cu meithal hriam hmun 4 ah tuar in a hmun rori ah a nunnak a cem. A nupi cu a Kut, a Tai le a Ke ah hriam a tuar ih Siizung ah tlanpi in an enkol cih.

Thuthang a suak pek ahcun mipakhat in a rak bawh cia ih innleng an suak hnu tawkfang ah a kap hai ti`n thuthang a suak nan Mayangone township venglal Ye Win Aung cun “an inn kiang ah cycle to mipathum in an kap that” tiah a ti.

A kap thattu hi zopawl an si ti a ciang hrih lo nan SAC ralhraang cun PDF pawl an puh. Ramleng media picang pawl khalin Dothleng cangvaihnak pakhat a si ding zum a um thu an tarlang a si.

Mytel cu Kawlram ralkap le Vietnam Defense Ministry kopaw ih dinsuahmi a si ih, Min Aung Hlaing hohami SAC ralhraang hnaṭuandan derthawngter dingin Dothlengnak ih an bat bikmi ralhraang company pakhat a si.

U Thein Aung cu Tipar ralbawi colh la zo a si. Mytel Telecommunications Co. ih CFO dinhmun in ralhraang kuthnuai ih hnaṭuan a si hlei ah atufang Min Aung Hlaing hrang hnaṭuantu ralbawi pawl thawn naivai zettu a si.

Leave a Reply

Your email address will not be published. Required fields are marked *