Phuhrungawknak neilo zetin kan ram dinhmun a tlaniam zia Min Aung Hlaing in relsuak

Ralhraangbawi Min Aung Hlaing in kan ram ukhruai thuneihnak a la hnu, kan ram tlaksiatlam a pan zia cu zo cio ih theihmi a si.

Ramsung buainak a sosang ih, harsatnak phunphun ruangah le nunrawng SAC ralhraang ruangah khua pumhlum rorin Inn le Lo suahsantu khal an um.

Pursum tuahnak a har hlei ah ralhraang dem in an mah thawn hnaṭuantlang duhlotu ram ṭhenkhat cun ralhraang pawl hrem in hna an ṭuanpi duhlo tikah ramsung ah hnaṭuan ding a mal sinsin.

Kan ram buainak le harsatnak hram thok dan kan zoh ciang tikah ralhraang SAC ralkap pawl ruangah sibikin a lang.

Cuvek sicingin, kan ram harsatnak thok tertu SAC ralkap pawl thu le mipi ih kan tuar cuahcomi harsatnak pawl cu rel tel loin ralhraangbawi Min Aung Hlang cun phuhrungawknak sihte tiatte khal nei loin kan ram a tlaksiat zia a relsuak.

December 3, Naypyidaw ih tuahmi SAC ralhraang hotu pawl meeting an nei nakah ralhraangbawi Min Aung Hlaing cun hitin a rel.

“Kan ram dinhmun zirin rampi ukhruai thuneihnak kan kilkhawi hnu, ramsung ah remdaihnak a um theilo ruangah ramdang thawn pursum tuahnak a remcang lo ih kan ram dinhmun cu tlaksiat lam a pan”.

“Thil dang ai in, Covid dokhamnak hrang caan tamsawn kan pekawk tikah budget lam khal siseh, ramsung hnaṭuan ṭhenkhat khal cu phawlawng in a um.”

“Cuhleiah, thu phunphun ruangah Siah pekawknak famkim in a um thei lo. Ramri ih pursum tuahnak khalah Siah pekawknak ṭhiṭhain a um thei lo ih, kan ram in a tuar na zet. Curuangah Siah pekawknak hrimhrim hi pangai le famkim ten kan tuah ṭul.”

“Cun, bank thawn pehpar khalin daan pahbal le diklo zetih hnaṭuantu an um ruangah Ukhruaitu lam in fumfe zetin kan zohkhen a ṭul. Cumi lawngah tu dinhmun ai ih hmun sang ah kan thleng thei ding” tiah Ralhraang bawi Min Aung Hlaing cun a rel.

Leave a Reply

Your email address will not be published. Required fields are marked *