PDF in Shanni mino hruaitu an kai

Tlunlam Sagaing, Bamauk myone ah Shanni Youth Assocation (ရှမ်းနီ လူငယ် ကွန်ယက်) Vice chairman Sai Sei Laing cu PDF ralkap in June 19 ah an kai tiah theih a si.

Amah hi Shanni calai le nunphung lam ṭuanvoneitu a si ih cazirnak thawn pehparin Bamauk peng, Mankat phungkitlawng a thleng lai ah tualsung PDF ralkap pawl in an hruai tiah an hnaṭuanpi Sai Htun Myint in VOS hnen ah a sim.

“Mankat khua ah calai thawn pehparmi thil ṭul tawlrel dingin a tlawng lai ah thusutnak zianghman um hran lo in an kai. An mah cun thusutnak malte kan nei duh ih kan hruai ta ding an ti. Kan nih lam cun kaih nak ding san zianghman kan thei lo” tiah a ti.

Sai Htun Myint cun thlah sal lohli an duh sak thu siseh, thei tawk suah in thuhla an ngeihven thu a rel ih “thil ṭul lo mi a cang vivo bet ding kan phang zet” a ti.

An kai nak san thuhla dang a um maw timi siseh, thuhla felfai theisuak dingin thu dongtu in PDF lam an pehtliah nan an hlawh sam.

Hih thu thawn pehparin atu ca kan ngan tiangah Bamauk PDF thusuahmi hmuh ding a um lo.

Bamauk myone cu kan rampi a buai hlan ihsin Shanni ralkap SNA umhmun khuarnak a si ih, kan ram a buai hnu, PDF ralkap pawl cuih ram ah an um thok ihsin khat le khat hmu aw thiam lo ruangah tuvek buainak a suak siding tiah zumnak a um.

Leave a Reply

Your email address will not be published. Required fields are marked *