Pawlkom pahnih ih ralrin pe zomi Tlawngsayama kah that tuar

Danlan tiih puh tuar Yangon Tlawngsayama HlaHlaThan cu tuizing November 5 ah kah that a tuar.

Amah hi Dalan tiih puhmi a si vekin Human Rights Defenders le Generation Z Defence Force timi pawlkom pahnih in ralhraang hnen ih zualko ṭheunak bansan dingin ralrin an pe dah zo.

Voikhat ralrin an pe ṭum ah a dai lawk nan, netalam ah a keel le bawr in a cangvai saal thotho ruangah November 3 ah ralrinpeknak ca an suah saal.

Voihnih ralrinpek a si hnu, tuizing November 5 ah Tlawng lam pan in taxi a to lai ah kah that a tuarmi a asi tiah kan thei.

HlaHlaThan thih thu thawn pehpar in Yangon, North Okkalapa ih an venghnen mipakhat cun Yangon hrambun media hnen ah hitin a rel.

“Amah hi Dagon khuathar အထက 2 ih suakthuan Tlawngsayama a si. Mawṭaw hlangin Tlawnglam a pan lai ah Lamlak ihsin an rak kap that.”

“Traffic point ih an cawl lai fangah voithum an kap. Siizung lam ah an tlanpi nan meithal hriam tuar loin a nunnak a cem” a ti.

HlaHlaThan ih venghnen mipakhat cun “amah ruangah Tlawngta le Tlawngsaya ziangmawzetlai kai an tuar zo. CDM tuahtu Tlawngsaya U Win Lwin tla cu ralkap pawl in thu an sut ih a Luruh an vuak ruai thluh ruangah a nunnak a cem. Amah ruangah Inn le Lo suahsan in humhimnak hawltu Tlawngta le Tlangsaya khal an um tiah an rel. Cuvek buainak pawl cu HlaHlaThan in ralhraang hnen ah zual a ko ṭheu ruangah a si ti`n an rel” a ti.

SAC ralhraang lamṭang media ṭhenkhat khalin HlaHlaThan thawn pehpar mi thuthang an suah ve ih “amah hi CDM tuahtu Tlawngsayama a si. Nuhmei an si ih zohkhen enkoltu an nei lo ruangah ṭihcingten Tlawng a zom saal. Innsang hrangah a nunnak a can” tiah an tarlang.

HlaHlaThan thih thu ah a Tlawngta ṭhenkhat kaihkhih tuar an um zo tiah theih a si nan a thattubik zo a si timi cu thufelfai a suak hrih lo.

Leave a Reply

Your email address will not be published. Required fields are marked *