NUG thusuahmi thawn pehparin PNLA hotu Colonel Khun Okka in a hmuhdan a rel

NUG cozah in ralhraang vanzam tlanpit in mipi lam ṭangtu ralkap pawl cu paisa tampi kan pe ding ti`n thu an suah ih, NUG thusuah cu thil olai a si lo ti`n Pa-O National Liberation Army hotu Colonel Khun Okka in a rel.

“Tuhlan ih hriamhrei ralthuam tlanpit dingih an sawm mi thawn a bangaw deuh lo. Tuhicu Vanzam tlanpit a si ih, vanzam mawng thei cin cu rank sang a ṭul.”

“Tlunlam thupeknak a um maw tivek tiang an ngaihven ih, Ground Crew an um lai. Cun vanzam mawngtu cu pakhat lawng an si lo. A hawipi le staff dangdang an um lai ih an zaten lungrual thluh a ṭul ruangah thil olai a si lo ti`n ka hmu” tiah PNLA hotu Colonel Khun Okka cun a ti.

NUG Acting President Duwa Lashi La cun tubaite ah “mipi kap hran loin raldo vanzam lole helicopter thawn mipi koptu ralkap pawl cu US $ ting 5 lawm man kan pe ding” ti`n thu a suah.

Acting President Duwa Lashi La thusuah thawn pehparin PNLA hotu Colonel Khun Okka cun “atakte` sim ahcun rel sin ding ka thei lo. SAC lam khal siseh, NUG lam khalin thinlung raldonak an tuah rero lai fang a si.”

“Cuti a si tikah sumsaw an nei maw nei lo tikhal hi sim theih a si lo. Nan, ka rel duh pakhat cu ralkaptlan mipakhat hrang hman ah a thup thei bik le harsa zetin an cangvai. Curuangah ka sim zo vekin vanzam tlanpit timi cu thil olai a si lo. Mitam lungrualtei` tuah ṭul a si tikah a harsa ding” tiah a ti.

NUG in SAC ralhraang ralthuam siat theitu le tlanpit theitu lawm mam tamzet an pe ding thu an phuang cu Dothlengnak thapetu mipi an tha tho zet ih, PNLA hotu Colonel Khun Okka rel vek in tlanpit a harsa khal a si le thil hmuahhmuah cu kan tuah sin lawngah atakin a rahsuah kan hmu thei ti`n mipi lam cun an pom a si.

Leave a Reply

Your email address will not be published. Required fields are marked *