Nobel sunloihnak hrang hrilsungmi pawl ah NUG cozah a tel ve thei dan cipciar …….

Ralhraangbawi Min Aung Hlaing in rampi ukhruai thuneihnak a la hnu, kum 1 a kim ni February 1 ah cozah dinhmun in ramkhelnak tuah rerotu NUG cozah cu remdiahnak Noble sunloihnak hrang hrilsungmi pawl ah a telve thu an phuang.

Cuih thu thawn pehpar in SAC ralhraang lamṭang pawl cun hnihsuakza a si ti`n thangsiat zawngin thu an theh darh.

“Hriamhrei ralthuam kaitu PDF/CDF pawl kaihruaiin ramsung ih a hraang zawng cangvaitu si cingin remdaihnak hrang lamlam Noble sunloihnak hrang hrilsungmi pawl ah an telh ve” ti`n NUG hmin thunluttu nasaten an soisel.

Noble sunloihnak hrangih NUG cozah hmin thunluttu cu Norway Liberal party sungtel pawl an si ih, party palai MP Ola Elvestuen cun “Nobel sunloihnak rak ngah zotu Aung San Suu Kyi kaitahratin rampi ukhruai thuneihnak latu SAC ralkap hi kawlram a buai thok ihsin kan rak thlir ringring. Mipi an soisa dan tivek tiang kan rak zoh”.

“Culak ah mipi ṭanpinak thawn rampi remdaihnak hrang ti`n cozah pakhat dinhmun ah dingin mipi kaihruaitu NUG cozah an rak ding. An nih khal, an dingsuak veten kan rak zoh ciangmi an si ih mipi thapeknak an co mi le remdaihnak hrang hmalaknak an nei mi hin leitlun mipi Lung a ciah neh. Curuangah Myanmar cozah dik dinhmun ah pomin Noble sunloihnak hrang hrilsungmi pawl ah kan telh” tiah a ti.

Noble hrang hrilsungmi hi January 31 tiang lawng sangka an on ih, hrilsungmi lak ihsin a nehtu cu October thla ah an phuang leh ding.

Leave a Reply

Your email address will not be published. Required fields are marked *