Mithiruak sartu Palikrual bomb puah tuar

Sagaing ramṭhen, Taze peng ih mithiruak phurtu palikrual cu leiphumbomb puah an tuar ih mithi 2 le hriamtuar 5 an um tiah theih a si.

December 13 ah Taze peng ah ruak 9 thahawknak rapthlak a thleng ih, cuih miruak pawl phurtu pengṭhen SAC palik pawl cu lamlak ihsin bomb puah an tuar a si.

“Zaanlam nazi 7 hrawngah Ywartharyar ihsin miruak sar ih kirsaaltu palikrual cu InTaingKung khua suahnak ziin ah bomb puah an tuar ih mithi 2 le hriamtuar nanawn palik 5 an um” tiah khuami pakhat in a rel.

Taze pengṭhen palik thawn naivaitu mipakhat khalin “Ywartharyar khua ah thattuar le inn urkaangmi a um ih, cumi zohciang dingin palik pawl an feh. Cumi khua ah inn 4 a kaang ih, meikang ih thi mipa ruak 5, meithal hriamtuar mipa ruak 4, azaten miruak 9 an hmu. Cuih hmun ihsin an kir lam ah bomb puah an tuar ih palik 2 an thi hlei ah hriamtuar 5 an um” a ti.

Palik thi 2 cu Tazemyoma palikzung ih palikbawi SoeKyawThu (ဒုရဲအုပ်) le Zin Ko Lin (ရဲတပ်သား) pawl an si tiah amahcun a rel bet hrih.

Bombpuahtu hi TPC – Taze People Comrades in an mah an si thu tlangthannak an nei ih palik 2 an thi thu siseh, mi 5 hnakih mal lo hriam tuar an um thu, thusuahmi ah an ngan tel.

Leave a Reply

Your email address will not be published. Required fields are marked *