Ralhraang pawl cangvaihdan a luarkaituk ruangah tuizaan ah Doawknak a suak thei

Kayin ramkulh, LayKayKaw khua ah PDF, CDM tuahtu le Dothlengnak thapektu an um ti`n ralhraang SAC ralkap pawl in khua an luhcilh ih mipum 23 an kai ruangah KNLA le SAC ralkap karlak boruak a sosang.

Ralhraang thazaang 200 hrawng cun December 14 zinglam nazi 8 hrawng ihsin thok, voi8nak luhcilhin ahmat 6 le 3 veng pawl ah an lut ih inn tamzet an cawklet. Cuihtlunah Ayeyarwady, Myaungmya NLD palai le CDM tuahtu palik 2 telin mi 23 an kai tiah theih a si.

Cuhnu ah ahmat 1 veng luhcilh an tum bet nan KNLA ralkap pawl in lut an siang lo ruangah kaphnih boruak a sosang zet tiah khuami pawl in an rel.

“Kaihkhih tuar pawl nan thlah lo cun nan lut thei lo. Cumi duh loin veng dang nan lut bet cun tlunlam ihsin kahtheihnak thu an suah zo ti`n KNLA ṭuanvo neitu pawl in ralhraang hnen ah thuthannak an nei zo” tiah tualsungum mipakhat in a rel.

Cuvek dinhmun a si ruangah sunlam ihsin khuasung dawr pawl an phit thluh ih lamziin vengsung pawl a dai khepkhep ruangah zaanthim/tlaihnu ah doawknak a suak thei ti`n boruak thlirtu pawl cun an rel.

Myawaddy thlanglam ih um LayKayKaw khuathar cu KNU tatmaha 6 kutthuai ih um hmunram a si.

Leave a Reply

Your email address will not be published. Required fields are marked *