Mipi ralkap Uniform hruk in Ralhraang ralkap cangvai

Magway ramṭhen, Gangaw peng, Tilin ah PDF uniform hruk ralhraang ralkap thlengthar an um ruangah ralring cio dingin YDF ((ထီးလင်း)) in mipi thu an than.

Tuni, July 9 zaanlam nazi 3 hrawngah Helicopter thawn Tilin khawsung ah ralhraang ralkap 25 hrawng an ṭhum ih cupawl lakah PDF uniform hruhtu an um.

PDF uniform le Lukhuh hlum an khuh ih mipi le mipi ralkap pawl mit vavai dingin an tuah hrim mi a si thei ruangah ralring dingin YDF in khawtlang mipi thu a than.

YDF ṭuanvonei mipakhat in “Kan dung ṭum doawknak ih ralhraang mithi pawl aiawh tuding an si thei. Cun, PDF uniform vek ciah an hruh. An tuar na ruangah cangvaihdan an thleng danglam ti`n kan hmu.”

“An tuar na ti kan thei rualin PDF thuamhnaw hruk ih cangvaih an tum cu mipi le kan ralkap hrangah ruah har a um deuh. Curuangah tualsung mipi siseh hmundangdang ih um kan ralkap pawl khal cang thei tawkin ralrin ka pe rero zo” tiah a ti.

July 2 ah Tilin peng, Ṭhalin khua kiangah ralhraang ralkap thazaang 200 hrawng cu mipi ralkap tatyin 4 komkhawm pawl in an do ih ralhraang ralkap 15 hrawng an thi.

Cuvek boruak a um ruangah le PDF kut ih um hmunram pawl cuh saal tum in ralhraang ralkap pawl ziinkong phunphun hawlin an cangvai mi a si.

Leave a Reply

Your email address will not be published. Required fields are marked *