Mipi Ralkap Pawl Soi Sel Hlawh Hlei Ce

Meithal keng mino pawl in kum upa lam nunau pawl funghreu thawn an vuak lai fang video cu online ah thlah darh a si ih, a suak pek ahcun ralhraang ralkap hmanfung pyusawṭhi pawl an si tiah thuthang a suak.

Nan, cuih zuknungtawi thawn pehparin BBC in thu felfai a zirzoi tikah, kum upalam kutthlaktu cu ralhraang ralkap lam siloin tualsung PDF pawl an rak si sawn.

Zirzoinak tuahtu BBC tarlang dan ah, hih thil cang cu tuhlan thla 2 hrawng rei zo ih rak zuk mi a si ih, an zuk nak hmun hi Sagaing ramṭhen, Shwebo peng, Ngatingyi khua ah si in, tubai lawngah internet cahmai ah thlah darh mi a si.

Vuak an tuar nak san cu ralhraang ralkap urkaang mi Inn thilri bulcawng lei tum in khua dang mi pawl Ngatingyi khua lam an feh ruangah ti a si ih PDF lam cun “security hrang an ralring thiam nak dingah kan vuak mi a si” tiah BBC hnen ah an sim.

Mi thawitu PDF an si ti`n thuthang a suak veten internet cahmai pawl ah soiselnak hmuh ding a tam ih, ralhraang ralkap cangvaihdan thawn a dangaw lo ti`n PDF pawl cu ralhraang thawn tehkhinin an soisel.

Nu le pa hrihruai rori thil zianghman silote ah dimnak um loin mi an thawi cu kan biaknak thawn a kalhaw titu khal an um ih, hivek thawiawknak cu mihring pianvo daan buar thawn abangaw tikhalin soiselnak a um ih, NUG hnen ah theihternak tuahin khawmi kut thlak tu hrem dingah dilngennak tuahtu khal an um a si.

Zuk : ShweBo PDF

Leave a Reply

Your email address will not be published. Required fields are marked *