Mipi ralkap in nazi 1 sungah Ralhraang Sakhaan lak suak

Magway ramṭhen, Yesagyo peng, SinPhyuShin ralhraang Check gate cu hriamkai ṭangrual pawl in nazi 1 sung ah an lak suak.

Tuni, June 9 nazi 12 hrawngah mipi ralkap ṭangrual pawl in ralhraang Check gate an kap ih olsamten nazi 1 sung ah an lak suak thei thu, Yesagyo Information in a tarlang.

Doawknak ah ralhraang ralkap 3 thi in, nungdam in pakhat an kai. Ralhraang ralkap ziangzat an um ti cu tarlang a si lo ih, hriam tuar le a tang mi ralhraang ralkap cu an tlanhlo thluh.

Ralhraang sakhaan ihsin meithal 8, cerek 1000, paisa Kyat tingzakhat luan, bomb 1 le mawṭaw cycle 4 an lak sak ih sakhaan cu an urkaang ta.

Ralhraang vakaptu ah People Defense Force – Yesagyo, Salingyi Special Task Force le People Defense Force – Myaung tipawl an tel ih hmailam khalah kutzakai in hnaṭuantlang an tum tiah theih a si.

Leave a Reply

Your email address will not be published. Required fields are marked *