Mipi ralkap an um lo veten Ralhraang ralkap in Khawsung ah mi ceek ciamco

Mandalay PDF pawlkom ṭhenkhat in khawpi an suah san thu an phuang hnu, tuizing May 6 ihsin thok, ralhraang SAC ralkap pawl in khawsung hmun tamzet ah mi an ceek ciam co.

“Tuhlan ih an duty dahlonak Siizungpi dunglam 27, 78 laamzin tipawl ah mi an ceek ciamco ih mawṭaw le mawṭaw cycle tivek tla an kham.”

“Taksa daap mi khal an um ih mawṭaw cycle tool box tivek tiang an ongter. Ziangruangah mi an ceek ti cu ka thei fiang lo nan meithal le hawlmi an nei ti`n ka thei” tiah tualsungum mipakhat in MFP hnen ah a sim.

Mandalay PDF pawlkom ṭhenkhat cun Dothlengnak thazaangpetu mipi an mal tuk ti`n khawsung um a him nawn lo thu an rel ih, amalbikah PDF ralkapbu 2 cun Mandalay an suah san sung thu, kandungbai ah mipi an sim thei.

Cupawl in Khawpi an suah san thu an phuang hnu nikhat-hnih ah ralhraang ralkap pawl cun khawsung ah duty in ceekawknak phunphun an tuah.

Tuzing, May 6 ceekawknak an tuah lai ah ralhraang thuthang pekṭheutu mipakhat kah that a si ih, zo pawl in an kap timi cu felfaiin theihfiang a si lo.

Siarcih : Mipi umtlandan an beidong ruangah PDF ralkap pawl in Mandalay Khawpi suahsan (May 4)

Mandalay khuasung ah cangvai ṭheutu Dragon Warrior ralkap pawl (MDY- PDF) cun Khuasung ah um a remcang nawn lo ti`n Khawpi an suahsan thu, tlangthannak an nei.

Cutiih thuthluknak an tuah naksan cu Dothlengnak ngai poimawh loin thei lo vekih hnasettuntu mipi an tam ruangah ti a si ih, “a thupten cangvai dan ding a har thlang” ti`n Dragon Warrior cun thu an suah.

“Mah thawn pehpar lomi vekin duhtawkih umtlangtu mipi an tam ruangah kan nih pawlkom cun Khawpi kan suah san zo”.

“Mipi zaten thindai zetin Mandalay khawpi ah ralhraang sal ah tangin rak um cio ko uh law. Khawsung umtlanding a cang thei nawn lo ruangah Khawpi cu kan suahsan hrih. Nikhatkhat ah nehnak thantar thawn Mandalay khawlipi ah ra kir saal kan beisei” ti`n Dragon Warrior FB cahmai ah theihternak an tuah.

May 2 ah Dalan thupeknak ruangah ralhraang SAC ralkap in PDF hriam tuar pawl colhnak hmun an siim ih mino 5 an kap that tiah theih a si.

Leave a Reply

Your email address will not be published. Required fields are marked *