Khawmi 25 that tuar thu ah KNDO Annka

Karen ramkulh, Myawaddy peng, Wallay myone ih mithi ruak 25 phorhsuakmi thu ah Karen National Defence Organisation (KNDO) in thuhla felfai simfiahnak an nei.

SAC ralhraang cun that tuar 25 cu sualnak neilo, Lamziin hnaṭuan pawl an siih KNDO kut tuar in rapthlak zetih that tuar an si tiah thuthang an suah.

SAC ralhraang thusuahmi ahcun “Myawaddy peng, Wallay myone ih Lilawn don hnaṭuan minung 47 cu KNDO in May 31 ah an kai. Nunau le nauhak khal an telih mipa 6, nunau 6 le nauhak 10 cu June 1 le ni 9 ah an thlah sal”.

“Culodang mihlo 25 cu hnaṭuannak thawn peng 1 hrawng hlatnak ah hmun 2 in an ruak pawl kan phorh suak ih miṭhenkhat cu kut dunglet khih in that an tuar” tiah thuthang an suah ih mithattu cu KNDO an si tiah an tarlang.

SAC ralhraang cun mawhphurtu cu KNDO an si tiah an ti nan, KNDO ṭuanvonei mipakhat cun hitin a rel ve….

“Wallay peng ah SAC ralhraang thawn May 31 in kan kapaw thok. Culai ah an mah lam an kap that ngah mi khal an um. Kan lam khalah hriam tuar 2 an um. Atakih vun rel cun mithi pawl hi lamziin hnaṭuan an si lo. Ralkap uniform khal an nei ih bo benmi le biakpawhnak ceet thilri dangdang khal an kol thup. Cupawlcu kan kut sungah an um thluh.”

“Thlakhat sung rori Drone vanzam thawn zaantin mi an thlingthla. Tuah nawn lo dingin kan sim nan kan thu an thlun duhlo ruangah tuah ṭul mi kan tuah si ko. Kan nih lam cun ral kan do tiah kan ruat. Kan thu an thlun duhlo hlei ah, an nih hi mawh neilo mipi thattu khal an si. Tlunlam thupeknak thawn mi thlingthla thup pawl an si” tiah Karen National Defence Organisation ih ṭuanvonei စောဝါးနေနူး in a relsuak a si.

That tuar 25 cu Bago nisuahnak lam ih um ဖြူး, အုတ်တွင်း, ပဲနွယ်ကုန်း, မန္တလေး, မင်းလှ le ကျောက်ကာ ih um pawl an si.

Leave a Reply

Your email address will not be published. Required fields are marked *