Mandalay Palikzung kiang ih KBZ bank an luhcilh

Mandalay khawsung, Lamzin 62 ih um KBZ bank ṭhen pakhat cu zo an si ti thei lo, mipahnih in an luhcilh ih kyat ting 400 luan an lak sak.

Tuzing, June 17, zinglam nazi 10 hrawng ah a si ih bank luhcilhtu cu meithal kengin mawṭaw cycle thawn an ra tiah a hmutu pawl in an rel.

“Bank hnaṭuan meithal thawn an tin ih counter ihsin paisa kyat ting 400 luan an la. Plastic dum thawn tuam mi thil pakhat an ret ta ih, nazi khuai sung ah palik nan ko cun kan ti puak ding ti`n an hringhro ta. Cule an tlan cih” tiah Khawmi pawl relmi cu MFP in a tarlang.

KBZ bank umnak hi palik sakhaan No. 3 thawn a neihaw zet nan bank luhcilhtu in palastic dum an tanta ruangah palik an ko ngam lohli lo.

“Palik le ralkap an thleng ih ralring zetin palastic an ong cu a sung ah lungto a rak um. An bum nak men a rak si” tiah vengsung um mipakhat in a rel ve ih “mitamsawn cun palik le ralkap an thleng hnu lawngah buainak a um ti kan thei” a ti.

Bank luhcilhtu hi zo an si ti theih a si lo ih ralhraang ralkap le palik pawl cun lamzin phit in kiangkap mipi pawl thu an sut nasa.

Miṭhen cun bank luhcilhtu hi an mah ralhraang lala an si thei tiah an rel nan, tu hrih tiangah thuhla felfai nemhngetnak ziang hman a um hrih lo.

Leave a Reply

Your email address will not be published. Required fields are marked *