MAH telin SAC ralhraang neihsiah Inn-Lo pawl an zuar sak tum dan cipciar

NUG cozah cun dothlengnak hrangah ti`n ralhraangbawi Min Aung Hlaing le ho pawl ih inn, inn-hmun le Loram ṭhenkhat zuar sak a tum.

Kan dung zarhte ni ah NUG cozah pumruang pakhat a si mi Planning, Finance and Investment minister U Tin Tun Naing in kumkhat pumhlum NUG cozah annual report a tuah nakah a rel tel a si.

A rei hlan ah an zuar thok tum ti a si ih SAC ralhraang in mah hlawknak hrang liolio ah mipi/cozah ta Inn-Lo an lak sak mi 40 kim zik cu market rate pangai hnakih zaṭek 70 malin NUG cozah in mipi le ramdangmi hnen ah a zuar tum tiah RFA in a tarlang.

NUG minister U Tin Tun cun “ralhraang ralkap hruaitu pawl in daan loin mah hrang hlawknak liolio ih an la mi Inn, Lo, Hmunram pawl cu kan zuar cing thlang ding. Cumi pawl cu netahnu ah Federal Army pi in a ṭul lo dingmi hmunram Inn-Lo pawl an si” ti`n NUG Parliament ah a rel ih “kan ngahmi pawl cu Dothlengnak hrangah hmual nei zetin hman a si ding” tiah a ti.

Ralhraang SAC ralkap hruaitu pawl hin Yangon khawlipi ih Inn Loram an neih mi pawl ihsin hlawknak tamzet an hmu.

Min Aung Hliang hin Yangon khawlipi, hmun cangkang Inya tili kiangkap ah properties 2 a nei.

Hih hmun ah 2011 tiangah neihsiah zianghman a rak nei lo nan ralhraang Than Shwe in ralbawi ah a ṭuan ter hnu, 2011 ihsin kum 5 sungah Inya tili kiangkap ah $ million tamzet man inn pawl a nei thok.

Pakhat cu 14 Inya tiih theihlar innpi a si ih ramdang khuallian le Tlangpar hriamkai hruaitu pawl an khual ṭheunak military intelligence guesthouse hrang hman dahmi innpi a si ih, cuih innpi khal cu NUG cozah in a zuar tum tiah theih a si.

NUG cozah hin tukum February thla ah ralhraang SAC ralkap kut ih um Innhmun Loram pawl zohsalnak policy a tuah ih, ralhraang kut ih ummi cu mipi hlawknakding hrangah kan la saal ding ti`n thu an rak suah dah a si.

Leave a Reply

Your email address will not be published. Required fields are marked *