Leitlunpi hmai ah SAC Ralhraang a mualpho neknek saal

Ramsung thubuai ah rampi thawn a pehpar lotu leng lam bawmnak dil cu zah thlak za a si hlei ah rampi phatsan thawn a bangaw tiih rak aukiotu SAC ralhraang cun an mah thawn hnaṭuantlang dingin leitlunhuap palikbu INTERPOL hnen ah bomnak an dil nan an hlawh sam lellel.

February 8 ah Foreign Affairs Ministry hotu Wunna Maung Lwin in Kawlram ralkap cozah thawn hnaṭuantlang dingin international security organisations pawl a sawm hai ih, ralhraang tiih puh mi NUG, CRPH le PDF cangvaihnak thawn pehparin hmalaknak nei sak dingin dilngennak an nei.

Cuih thu ah Singapore hrambun CNA media cun leitlunhuap palik pawlkompi INTERPOL hnen ah bawm an tum le tumlo thu suhfiangnak an nei ih INTERPOL lam cun an bawm tum lo thu fiang zetin an let.

INTERPOL ṭuanvoneitu cun “thudanglam tibaaklo cu sungtel ram thuhla ah INTERPOL a hrolh aw lo ding” a ti.

Cuhleiah CNA thusutnak thawn pehparin “Cozah lak ih thubuai siseh, cozah dotu lole Dothlengnak thawn pehparin ram pakhat sung thu ah INTERPOL in bawmnak a pe lo ding” ti`n INTERPOL cun cakuat thawn an let bet a si.

SAC ralhraang cozah cun NUG, CRPH le PDF hriamkai pawl cu ralhraang dinhmun in Leitlun mipi hmai ah pholang a tum nan, Human rights thawn pehparmi pawlkom 250 lenglo cun an mah SAC ralhraang riangri cu INTERPOL sungtel ram ihsin hlon hlo dingah dilngennak an rak nei dah zo a si.

Leave a Reply

Your email address will not be published. Required fields are marked *