Leitlun mipi hmai ah SAC ralhraangbawi Min Aung Hlaing a Mualpho

Mi ram buainak ah hrolh aw lo ding timi thurin fehpitu ASEAN cun mangbangthlak zetin October thlacem lam ih tuah dingmi ASEAN hruaitu pawl meeting nakah SAC ralhraang telh lo dingin tuini October 15 ah thu an rel cat tiah theih a si.

Hitiih an hrem tum nak san cu tuhlan thla 5 luan zo ih ASEAN meeting thusuak pawl SAC ralhraang in a thlun duhlo ruangah a si ih, curuangah Oct 26-28 ih tuah dingmi ASEAN leaders’ summit ah SAC ralhraang Min Aung Hlaing sawm tel lo dingin thuthluknak an tuah mi a si.

Rintlak Hram 5 in Reuters hnen ih an sim dan vek a si le ASEAN leaders’ summit ah Min Aung Hlaing aiah ramkhelnak thawn pehpar lomi midang an sawm tum ti a si.

Hram dang pahnih khalin “ASEAN thu bot cat mi SAC ralhraang in a cohlang lo a si cun meeting nakih Myanmar tohkham lawngter dingin ASEAN ministers in a lungkim zo” tiah Reuters hnen ah an sim bet hrih.

Hitiih, ASEAN leaders’ summit ih Min Aung Hlaing an sawm tum lo mi cu ASEAN sungtel ram pawl thawn naiaw zettu Min Aung Hlaing hrangah zah thlak zet a si ih, a rualáš­ha tiih a ruahmi ramhruaitu pawl in an phatsan tinak a si. Hih thu thawn pehpar in Reuters in SAC ralhraang a pehtlaih nan ralhraang pawl in an biak duh lo.

ASEAN leaders’ summit ih Min Aung Hlaing an sawm tum lo mi cu Official in an phuang hrih lo ih, thaisun October 16 ah ASEAN chair Brunei ram palai in Official in a phuang ding tiah Reuters in a ngan a si.

Leave a Reply

Your email address will not be published. Required fields are marked *