Kum upalam Putar Pitar pawl cu Ralkhamphaw ah an hmang

Sagaing ramṭhen, Depeyin peng, Intan khua ih kum upa putar pitar pawl cu duh lo cingin ralhraang SAC ralkap pawl in ralkhamphaw ah an hmang.

April 15 zing ah ralhraang pawl Intan khua ah an lut ih phungkitlawng ih nithianghlim hmang rerotu kum upalam mi 30 lenglo cu ralkhamphaw ah hmangin duh lo cingin an hruai tiah khawmi pawl in an sim.

“Ralkhamphaw hrangah phungkitlawng ih caan hmanglai kum upalam 30 hrawng an hruai hlei ah khawsung inn pakhat luhcilhin mi an kai ih an inn an urkaang. Cuih hmun khalah putar pitar pawl cu an hruai. Khualeng an suak khalah an hruai cih.”

“Khualeng lam ah PDF in bomb an rak puah ṭheu ruangah puah ngam hlah hai seh ti`n khawmi pawl ralkhamphaw ah an hmang. Mawṭawtlar hmaisabik le netabik pawl lakah an thar` vivo” ti`n khuami pakhat cun BBC hnen ah a sim.

Khawmi pawl cu zinglam nazi 8 hrawngah an hruai ih an hei nawn lo cin, sun nazi 11 hrawngah an thlah saal tiah theih a si.

Depeyin peng, khuate pawl ah Ralhraang SAC ralkap le mipi humtu ralkap pawl an doaw thei zetih khawmi tamzet cu tualsung ah um ngam loin hramlak ah an beu.

Kah that tuar khal an tam ih, Ralhraang in vansang ihsin bomb an thlak ṭheu ruangah nunnak liam le umnak nei lo ih vakvai an tamzet tiah theih a si.

Leave a Reply

Your email address will not be published. Required fields are marked *