Ko Jimmy le Phyo Zeya Thaw telin Thawngtlak 4 pawl an that dan cipciar thuthup a puut

Ralhraang ralkap in Ko Jimmy le Phyo Zeya Thaw telin Thawngtlak 4 pawl an that thu cu July 25 ah thuthang ah an suah zo nan, thu cipciar an phuang tel lo.

Nan, atu ah Insein Thawnginn thawn naivaitu palik hnen ihsin thuthang a suak ih hmin tarlang lomi Hram pakhat cun “July 23, zarhtezing nazi 4 le minute 15 ah hridai thawn an thlai that” tiah Myanmar Now hnen ah a sim.

Ralhraang thuṭhenzung in thih daan a tat mi Thawngtlak 4 pawl thlaithatnak cu Home Affairs Minister Lieutenant General Soe Htut kaihruainak thawn Insein thawnginn ah an tuah tiah amahcun a rel bet hrih.

Thawngtlak 4 an thlai that hlan, tlawngkai ninga zaan ihsin Insein thawnginn sung umtudan pawl an ti danglam ti a si ih, rawl pekawkdan tivek khal an thleng danglam tiah Hram pakhat in a rel ve.

“Pangai ahcun rawl ei a cu le thawngtlak pawl an tlaraw. Nan, tlawngkai ninga ihsin an tlaraw nawn lo. Thawnginn hnaṭuan pawl in an umnak cio ah rawl an pe” tiah amahcun a ti.

Tlawngkai ninga zaan ihsin thawnginn meisa an mit thluh ih Thawngtlak thlai that nak ding hmun lawng mei sa an pe. Cun, zinglam nazi 3 le 4 hrawngah aihram awn a theitu an tam tiah Hram pakhat in a rel ve ih “an thlai that hnu zinglam nazi 4 luan ah an ruak pawl an urkaang cih” a ti.

Thawngtlak 4 that ding thu hi an sungkhat naivai zohman theihtermi an nei lo ih, July 22, Tlawngkai ninga ah minute 20 sung online video call in an biakawter. Cumi tiangah thawngtlak pawl khalin thah ding an si thu, zianghman an thei lo.

Ralhraang ralkap in thawngtlak 4 pawl thah an si zo thu, thuthang an suah hnu ah sungkhat naivai pawl in ruak lak an dil nan pek an tum lo.

Hih thu ah Leitlun rampicang hruaitu le human ringhts pawlkom pawl in ralhraang ralkap an dem nasa nan, ralhraang ralkap lam cun a dik mi le ramhrang ṭhatnak ruatin kan tuah mi a si ti`n an sanglet ve.

Leave a Reply

Your email address will not be published. Required fields are marked *