KIA le PDF siah khong dan luarkai deuh ti`n soisel hlawh

Saklam Shan ram, Muse le Kutkai zinpi ah KIA ralkap in siah an khong nasa ruangah mipi lam soiselnak a um.

Thilphur mawṭaw le Khualphur mawṭaw lawng siloin bulak mawṭaw thawn innsaang khualtlawng pawl tiang siah an khong ti a si ih, an cangvaihdan a luar kai deuh ti`n khawmi lam in an soisel a si.

“Mawṭaw zate deuh thaw an kham. Mawṭaw mawngtu le mawṭaw number cipciar an sut ih mawṭaw khal an zuk cih. Siah pek nak ding hmun an sim ih tu thla ni 15 hnak ih tlai lo ah pek tengteng dingin an sim thei” tiah cuih zinpi ih mawṭaw mawng mipakhat in Shan news hnen ah a sim.

Mawṭaw khamtu hi KIA ralkap lawng siloin PDF khal an tel ti a si ih khawmi ṭhenkhat cun hringhroawknak tivek tiang a um ṭheu ti`n an sim.

“Siah pek nak ding ah tu thla ni 15 hlan ih nan pek lo cun neta kan lo hmu a si le hrem nan si ding tikhalin mi an ti. Siah peknak caken a um lawngah nan luat ding ti`n mi an sim thei” tiah Lashio-Muse zinpi ih mawṭawmawng mipakhat khalin a rel ve.

Hih thu thawn pehparin KIA ralbawi Colonel NawBu hnen ah Shan news in sutfiahnak a nei tikah “Siah khongnak cu daan pangaiin kan tuah ko. Amah belte ziangzat an khong tivek cu ka thei lo. Ziangtin an khong, ziangzet an khong tvk cu cuvek lam ṭuanvo latu thawn a pehpar aw” tiah a ti.

Saklam Shan ram cu SSPP/SSA, TNLA, MNDAA le mipi ralkap ṭhenkhat cangvaihnak hmunram a si.

Leave a Reply

Your email address will not be published. Required fields are marked *