Khuathim hnu ah ralhraang SAC ralkap pawl in rinlopin mi an kai ciamco

Yangon, Kyeemyindaing ih thil thleng thawn pehpar in Yangon Myone/Veng ṭhenkhat ah SAC ralkap tihrimin khuami pawl in bungbel khukheng an tal ciamco thok.

December 5 ih lamzawhtu pawl ralhraang mawṭaw thawn pah an tuar hnuah mipi thinhennak a sosa saal ih, hriam tuar le kaihkhih tuar pawl dinpitnak le Dothlengnak mipi thisen a dai hrih lo zia langter nakah Yangon hmun tamzet ah bungbel khukheng an tal ciamcomi a si.

Cutiih, mipi lungrual zetih cangvaihnak an nei lai ah ralhraang SAC ralkap pawl cun rinlopin mi an kai ciamco tiah theih a si.

Thingangyun ih um mino pakhat cun “zaan thim hnu a si tikah mi ziangzet an kai ti kan thei lo. Kaih an tuar lai hmu ciangtu khal an um. Mipi cangvaihnak hnaihnok in le mipi ṭhih nakah an huuk an raak nan, kan thisen ih hram a bun hnget zomi Dothlengnak lungput cu in tham sak ban thei cuang lo ding. Ziangvekin in hnaihnok a si khalah cu hnak ih cak sinin in hmai kan nor thotho ding” tiah a ti.

Yangon, myone dang khalah bungbel talnak veng sung ih an hmumi pohpoh cu ralhraang pawl in kai tum in an hual ciamco tiah theih a si.

Yangon, Yae Kyaw ih um mino pakhat khalin “kan veng ah ralkap pawl an ra lut ih an hmumi thil siat thei hmuahhmuah cu an siat thluh. Ṭongkamsia thawn mi camriam phah in meithal an kap ciamco. Kan veng ah kaih tuar a um le umlo cu ka thei lo nan, veng dang ih kaihkhih tuar an um thu cu ka thei. Thaizaan lam khalah kan tal tum saal. Mahbelte lungrual zetin inntinten kan tal thei cun ralhraang pawl an vavai thluh ding” tiah a rel.

Ralhraang SAC ralkap pawl cun lamziin ih an hmuh phopoh kaih thluh an tum ih, kaih tuar khal an um nan, mi ziangzet an kai ti cu felfai in theih a si hrih lo.

Yae Kyaw ih SAC ralhraang cangvaihdan video ……. a zuktu hrang ruatin video rong an ti danglam hrimmi a si…

Leave a Reply

Your email address will not be published. Required fields are marked *