Khua khat ah mino 3 fingfing ralkap lutter dingin Mipi an phut

Shan ramkulh, Pa’O mahte ukhruaiawknak hmunram khawte ṭhenkhat ah PNA ralkap (Pa-O National Army) in khua khat ah mino 3 fingfing ralkap lutter dingin mipi an phut.

Ralhraang SAC ralkap hnaṭuanpemi khawbawi pawlin PNO ralkap ah lutter dingin kum 18 ihsin 35 karlak mino hmin cazin an la rero zo ti a si ih, cumi sungin khua khat ah mino 3 fingfing suah cio dingin thu phut an tuah.

Cuhleiah Pa’O mipi humvennak hrangah ti`n innkhat ah kyat thawng sawmthum khongawknak a um ti`n khawmi pawl in an rel.

Hivekih hmalaknak an nei mi cu mipi lam in tha an pe lo hlei ah a dodaltu khal an um nan, tuahlo theihloin ralkap pawl in thuneihnak an suah tiah khawmi pakhat cun a rel.

“Mipi in kan duh lo kan ti khal le a theih lo. Ka pasal tla hmin cazin lakmi ah a tel. Kan neiaw pekte a si ih simrelding khal ka thei lo.”

“Midang khalin an dodal nan a theih cuang lo. Kan nih mipi lam cun rampi a buai pek ihsin SAC ralhraang kan dem. Nan, PNO ralkap rualin SAC ralhraang lamṭang khal an um ve. Cupawl kha ralkap ah lutter sawn ding an si nan…..” ti`n khawmi pakhat cun a rel.

Kum 18 ihsin 35 karlak Pa’O mino pawl cu PNO ralkap ah lut tengteng dingin thu an phut hlei ah cuhnak ih upa cin cu khawsung humvennak tuanvo la dingin hnaṭuan an ko.

An thusuah thlun duhlotu cu kyat 45,000 cawhkuan phut mi tla an um ti`n khawmi pakhat in a rel ve.

“Tuhrih tiang cu ralkap lut tengteng dingih hringhroawknak a um le umlo ka thei hran lo. Ralkap lutter dingin khawkhat ah mino 3 hrang camcawhfung an zukter. Ralkap lut ding cazin ih telmi pacangno ṭhenkhat cu naupai lai innsangnu pawl in lutter hram lo dingin ṭap phah in zangfah an dil nan a theih cuang lo. PNO lamṭang miṭhenkhat khal ralkap lutmi an um ve” tiah amahcun a ti.

Pa-O National Organisation in an ramsung khawte 4-5 hrawngah kan dungbai ihsin khawkhat mi 3 ralkap lutter an si ding thu, thuthannak an rak tuah zo tiah theih a si.

zuk : Pa-O National Army
**(input from local agencies)**

Leave a Reply

Your email address will not be published. Required fields are marked *