Khawsung doawknak ah Mipi ralkap hruaitu nunnak liam

Mandalay khawlaili doawknak ah Yadanarbon Revolutionary Force commander Htet Shin Zaw in ram le miphun hrang nunnak a hlan.

Khawsung ah mawṭaw cycle a to lai ah ralhraang ralkap pawl in an dawi ih kahawknak a suak hnu ah a hmun rori ah a nunnak a cem. Buai laifang hmuciangtu khawmi pawl rel dan ah ralhraang ralkap lam hi uniform an hruh lo ti a si.

Mawṭaw cycle thawn an dawiaw ih ralhraang ralkap lam in “amah si ko. A mah rori a si. A ciang …” ti`n an au phah tiah khawmi pakhat cun a rel.

“PDF lam in meithal thawn an kap hmasa. A dawitu pawl in an kap leet ih a hmun ah mipakhat (PDF hruaitu) a thi. Ralkap lam khalah hriam tuar an um ih mawṭaw thawn an phur tiang cu a nung dam lai. Nan, a besia zet” tiah amahcun a ti.

Kahawknak a tawp hnu ah ralhraang ralkap in mithiruak an dap ih a paisa, phone le thil ṭha a neih mi an lak sak hnu ah a ruak an hlon ta.

Amah hi YRF commander a si hlei ah central pawlkom sungtel ṭuancih a si ih, mipi ralkap pawl in a ruak an la ngah lo nan, June 26 ah asangbik upatnak pekin caanserh an hmang tiah theih a si.

Mipi ralkap pawl in Mandalay khawsung ah June thlalai hrawngin kahdonak an tuah nawt thok ih, ralhraang lam khalin lamzin phit le mi hawl in an cangvai ve a si.

Leave a Reply

Your email address will not be published. Required fields are marked *