Khawtlang mipi indingmi tidai ah Hrik that sii an polh sak

Saklam Shan ram, Kyaukme peng, Hukwet khua ih in-ti cu October 7 zinglam nazi 9 hrawng ihsin a phul ciamco ih Hrik that sii a nam tiah khuami pawl in an rel.

“Tlang tithiang kan lak mi a si ih zo in si maw Hrik that sii in polh sak siding tiah kan ruat. Zinglam ah tidai kan ong sin cu a phul pipin a suak. Cuhleiah Hrik/Ceepte that sii a nam. Tutiang cutin a um lai. Kan hmang ngam lo” tiah Hukwet khuami mipakhat cun a sim.

Tlang tithiang cu an khua thawn peng 4 hlat hrawngah a um ih, cuih hmun cu Shan hriamkaibu RCSS/SSA ih umhmun khuarnak khal a si cih.

“In-ti, rawlsuannak khalih kan hmanmi a si. Tidai a thiang ih a thaw` khal a thaw. Ka suah ihsin tuihlan tiangah hivekin ti a phul dah lo. Kan thin a hring. Tur thlah mi siding kan zum ruangah kan hmang ngam lo. Curuangah khua dunglam ih tidai kan hmang” tiah Hukwet khuami cun a rel bet hrih ih “mawh neilo khuami pawl ih nunnak hrang tiang ṭihnung ding khawpin hivekih tiaw cu a ṭha lo” tiah a ti.

Hih thu thawn pehpar in RCSS/SSA lam cun zianghman an theihpit lo thu le an mai` tuahmi a si lo thu an rel ve.

“A cang thei lo. Kan mah tuahmi a si lo. Kan daan le dun khalah khuatlang mipi hivekih tiding timi a um lo” tiah RCSS/SSA ih ṭuanvonei Major Sai Kham San cun a rel.

August thla thok hrawngin Kyaukme peng ah SSPP/SSA, TNLA le RCSS/SSA nasaten an kapaw ih, doawknak boruak ah Hukwet khua kiangkap cu RCSS/SSA hriamkaibu in khual tlawng sukso a kham.

Hukwet khua nisuahnak lam ah RCSS/SSA hriamkaibu umhmun an khuar ih khua dunglam ah SSPP, TNLA hriamkaibu pawl umhmun an khuar tiah theih a si. (TSN)

Leave a Reply

Your email address will not be published. Required fields are marked *