KBZ bank paisa phurtu mawṭaw suam tuar

Yangon ramṭhen, Dagon khawthar, Pinlon lamzin, Kanbawza Bank hmai ih ding lawk bank paisa phurtu mawṭaw cu May 13 zaanlam nazi 3 hrawngah misual pawl in an suam tiah theih a si.

Yangon khawsung hmun hranhran ih KBZ bank pawl ah paisa a la khawm lai ah misual pawl in rinlopin an suam tiah khawmi pawl in an rel.

“Bank hmai a thlen nak hman a rei lo. Mawṭaw thawn an ra ih paisa dip kiltu naam thawn an tin hnu ah paisa an tlanpi” ti`n tualsungum mipakhat in Ayeyarwaddy Times hnen ah a sim.

Paisa lak sak mi cu kyat ting 1000 luan hrawng sivekin thu a lengvak nan atu ca kan ngan tiangah KBZ bank lamin siseh, SAC ralhraang khalin thuhla zianghman an suah hrih lo.

Bank paisa phurtu mawṭaw an suam veten ralhraang ralkap pawl in lamzin an phit ih ceekawknak tivek an tuah tiah tualsungum pawl cun an rel.

Kan rampi a buai hnu ah sunvanglai rori ih suamawknak, bank luhcilhnak tivek a pung sawt zetih, kan dung April 6 khalah South Okkalapa ih KBZ bank ṭhen pakhat cu misual pawl in an luhcilh ih kyat ting 2000 hrawng an la tiah theih a si.

***Zuk remcang tar menmi a si

Leave a Reply

Your email address will not be published. Required fields are marked *