Kawlram Mipi ṭanrualnak zarah DJ hminthang pahnih Myanmar rat an ṭhulh

Singapore hrambun DJ 2 (Rave Republic) cun hmai thla ih tuah ding mi tidai toih puai hrang, SAC ralhraang sawmnak cu hnong saal in Myanmar rat an ṭhulh thu mipi an sim thei.

Naypyidaw ih tuah dingmi tidai toih puai ah awnmawi thawn mipi awi dingin SAC ralhraang sawmnak an cohlang zo nan, Kawlram mipi simfiah cakuatnak thawngin le kan ram dinhmun an thei ciang saal ruangah an ṭhulh saal mi a si.

“Media lam report nak a mal ruangah nan ram dinhmun kan rak thei ciang lo. Cakuat pawl kan hmu veten nan lam ah ṭangin puaipi hrang kan ṭhulh cih. Thuhla in sim ciang mi par ah kan lung awi zet. Kan kiangkap ah ziang vek thil a cang ti ngaih ven thiam dingin kan zir vivo ding” ti`n, Rave Republic cun FB comment ah Kawlram mipi an sim thei ih rampi dinhmun thlengaw lohli thei nak ding hrangah duhsaknak an hlan cih.

Daan loin rampi ukhruai thuneihnak latu SAC ralhraang cun ziinkong phunphun hawlin kan ram buainak a khuh hlo tum ringring.

Hmai thla ih tuah dingmi tidai toih puai khalah ramsung remdaizet bangin Lem an cang tum ih, leitlunhuap hminthang Warner Music Group thawn hnaṭuan tlang Rave Republic cu puaipi ah telpi dingin an sawm.

Tidai toih puai hrang Rave Republic sawm an si thu, tarlang a si veten SAC ralhraang tumtahmi simfiang in Kawlram mipi in ca an kuat nat sat ruangah Ralhraang sawmnak hnong saal in Kawlram rat an ṭhluh a si.

DJ Magazine le Wikipedia ih tarlang mivek a si le Rave Republic cu leitlunhuap DJ thiamsang Top 100 ih tel ban ve an si.

Leave a Reply

Your email address will not be published. Required fields are marked *