Kan ram hnen pawl in Kawlram mipi ziang an siar lo zia a lang vuarvi

Kan ram a buai pekte ah ralhraang ralkap soiselvetu ASEAN pawlkompi cu netahnu ah hnisiamsiten ralhraang ralkap thawn cibei an buk aw leh ding tiah miṭhen in an rak sim cia mi cu atu ah atakin a cang ngaingai thlang.

Khawsung ah buainak a suak vutvo lai ahcun ralhraang ralkap an dem nasa ih ASEAN pawlkompi meeting khalah ralhraang ralkap hruaitu pawl an sawm tel lo.

Nan, tuṭum, Cambodia khawpi a simi Phnom Penh ih tuah mi ASEAN Defence Ministers Meeting ahcu SAC cozah pumruang pakhat a si mi Defence Ministers zung ihsin ralbawi Mya Tun Oo meeting a kai ve.

Himi meeting ah ralhraang ralkap telh lo dingin ramsung ramleng pawlkom 650 lenglo in dilngennak an tuah nan, tikcucaan a thleng taktak cu zoi mithmai hman zoh lo in ralhraang ralkap palai meeting an kaiter ve.

Ralhraang aiawh ih meeting kaitu ralbawi Mya Tun Oo hi US cozah in SAC ralhraang luban pawl hremnak a pe mi cazin ih telbanve a si hlei ah ASEAN pawlkompi in ralhraang pawl meeting kai a khap hnu, ASEAN meeting ih tel hmasabik ralhraang aiawh palai a si.

ASEAN sungtel ram a si mi Singapore, Malaysia, Indonesia le Philippines hruaitu pawl cun ralhraang meeting kaiter lo dingin caanthiah ASEAN hruaitu Cambodia hnen ah kan dil an ti nan “ASEAN sungtel ram 10 sung ihsin ram 8 pawl lungkimnak thawn meeting ah an tel” ti`n Cambodia cozah ṭuanvonei Tea Banh in a rel ih “ASEAN sungtel ram pawl lungrual zetin kan um tlang timi kan langternak a si” a ti.

“Meeting ah SAC cozah an tel khal le Kawlram mipi aiawhtu cozahdik an si ti`n kan pom tinak a si lo” Ministry of Defence, Malaysia

ASEAN Defence Ministers Meeting cu mani ah an thok zo ih Tlawngkai nithum ah meeting kaitu ASEAN palai zaten China le Japan Defence Minister pawl an tong ding tiah theih a si.

Leave a Reply

Your email address will not be published. Required fields are marked *