Kalay peng doawknak ah SAC ralhraang tuar na

Tuini, February 7 Thlanglam Kalay doawknak ah ralhraang SAC ralkap 17 an thi thu theih a si ih hriamkai ṭangrual lamah CNDF ralkap pakhat in ram le miphun hrang nunnak a hlan.

Zinglam nazi 10 hrawngah Yangyiaung khua lam ihsin Kalay lam pantu SAC ralhraang mawṭawtlar cu Aungchanthar le Chaunggwa karlak ah hriamkai ṭangrual pawl in an rak kap ih ralhraang 9 hrawng an thi.

Hriamkai ṭangrual lam ah PDF (Kalay) ၊ CNDF ၊ CDF (KKG) ၊ RKDF le ပ.က.ဖ pawl an tel thu, People’s Defence Force (Kalay) in thu an suah ih “meithaltum hriam tuarin CNDF ralkap pakhat a nunnak a liam” tiah an tarlang.

People’s Defence Force (Kalay) cun zaanlam nazi 2 hrawngah voihnih, zaanlam nazi 5 hrawngah voikhat ti`n ralhraang mawṭawtlar bomb an puah bet thu an ngan tel ih “mawṭaw pakhat siatin ralhraang 8 hrawng an thi. Ralhraang pawl cu nazi 7 tiangah Htaukkyant khua an pahtlang thei hrih lo” tiah thusuahmi ah an tarlang.

Tuini, Kalay peng ih ralhraang mawṭawtlar bomb voi 4 puah nakah ralhraang SAC ralkap 17 an thi thu siseh, CNDF ralkap 1 a thi thu le hriamkai ṭangrual lam ah natuklo hriamtuar 5 an um thu, February 7 ah People’s Defence Force (Kalay) in mipi an sim thei.

Leave a Reply

Your email address will not be published. Required fields are marked *