Kalay doawknak ah ralhraang tampi an thi, hriamtuar an tam

April 22, Sagaing ramṭhen, Thlanglam Kalay peng doawknak ah ranksang ralbawi 3 telin ralhraang ralkap le pyosawṭhi 20 lenglo an thi thu, PDF Kalay in April 23 ah thu an suah.

Kalay hrambun ခလရ 87 ih ralbawi Hṭet Aung Khaing hohami ralhraang ralkap 10, Kyaukpyoke khua kiangkap ih cangvaitu palikbawi Chit KoKo hohami ralhraang 5, Pyithusit Ngain Lin Aung hohami ralhraang 15, Innkyun khua hrambun palikbawi Aung myo Ting hohami ralhraang 4, zatekom ralhraang thazaang 30 luan cu Yaeshin khua kiang ah PDF hriamkai ṭangrual pawl thawn an kapaw ih ralhraang lam mithi an tam hlei ah ruak sar ngam loin an tlanhlo thluh tiah theih a si.

Ralkap sunglamthu putdarh mi ah “Ralbawi Hṭet Aung Khaing telin SAC ralkap an thi tam hlei ah hriam tuar 11 an um. Cun, ralhraang mithiruak pawl cu tutiang an lak thei hrih lo” tiah an tarlang.

Doawknak ah ralhraang lam cun hmun 3 rorin hmai an nor ti a si ih an zaten thazaang 250 hrawng an si ding ti`n PDF Kalay thusuahmi ah an ngan tel.

Doawknak a nasa zetih Kalay PDF lam ah ralkap pakhat in ram le miphun hrang nunnak a hlan ih hriam tuar 2 an um.

Ralhraang dotu hriamkai ṭangrual pawl ah PDF (Kalay) ၊ CDF (KKG) ၊ RKDF ၊ ပ.က.ဖ tipawl an tel ih zinglam nazi 10 hrawngin zaanlam khaw thim zik tiang an doaw tiah theih a si.

Doawknak hmunram pawl cu PDF Kalay in April 23 zing ah zohfel thianfainak an tuah ih hlamtu neilo ralhraang ruak ṭhenkhat lakah meithal, cerek, phone le biakpawhnak cet kan hmu ti`n PDF Kalay cun a tarlang.

Leave a Reply

Your email address will not be published. Required fields are marked *