Hlasakthiam Ni Ni Khin Zaw hrem dingin mipi an sawm khawmaw

NLD cozah san ah Leitlun huapin kan ram ti hmin ṭhatu tiih mipi suanvawr zetmi hlasakthiam Ni Ni Khin Zaw cu Dothlengnak thapetu mipi pawl sawmawkhawmin hremnak pe dingah thuthannak an nei mi internet cahmai ah hmuh ding a tam.

Kan ram a buai hnu, ralhraang haihotmi puaipi siseh, an mah thawn pehpartu pawl ih tuahmi puaipi tivek ah ramsung mihminthang le hlasakthiam tivek pawl tel ve lo dingin mipi lam in nasaten an kham ih, cuvek cing ih a tel thotho pawl cu social punishment pe dingin mipi an sawmaw ṭheu.

Tukhalah hlasakthiam Ni Ni Khin Zaw cu ralhraang tuahmi puaipi tivek ah hrolhawin ralhraang le ralhraang thapetu pawl thawn naivai zetin hna an ṭuan tlang ti`n thuthang a suak hlei ah, khuapi urkaang sak le ei-inding neilo raltlan an tam lai ah youtube ah cover hla a thlah cingcing ti`n social punishment pe dingin mipi an sawm khawmaw.

Ni Ni Khin Zaw hi FB cahmai ah cu a lang tuk lo. Asinan, Chin ram, Kayah, Sagaing ramṭhen tipawl ah khua pumhlum rorin ukaang sak le ei-inding neilo raltlan an tam lai ah tuhlan thalkhat sung lawngah Youtube ah cover hla le tikap ih an lam lai tivek video 30 kim zik a thlah.

Cuih thuthawn pehparin thu um dan simfiahtu FB cahmai pakhat cun hitin a tarlang….

“Midang khal video tuah an um ko. Nan, tamsawn cu dothlengnak hrangah ti`n maw, cunah khanah miharsa bawmnak hrangah ti`n mipi hrang tlawmngaiin an tuah.”

“Nan, a nih cu cuvek simfiahnak zianghman a nei lo. Apoi bikmi cu a mah hi Asia mualpi le nitlaknak ram pawl tiang fan tampi nei mi a si. Tukhalah video a thlah mi zate ah ramleng ihsin a zohtu an tambik.”

“Dothlengnak kan tuah lai ah ramdangmi pawl in a video zohin ‘an ram a dai tuk ko’ ti`n in hmusual thei mi hi ruat ṭhat a ṭul. Maw, ralhraang thapeknak/fialnak thawn a rak tuahmi khal a si thei ziar” tiah tarlang a si.

Ni Ni Khin Zaw thu ah mipi an thintok nak san bik cu NLD cozah san ah NLD thantar rong sen cawimawi in “Red, Super Red” tivek hla tiang a rak san nan atu ah ralhraang thawn naivai zetin an um tiih thuthang a suak bet mi hin mipi a ti thinheng luar. Comment ngantu mipakhat phei cun “Green, Super Green” tivek hla a sak leh khal a si thei tiah a ti. Mipakhat khalin “Ka hla duhbikmi pawl Ni Ni Khin Zaw in a cover ih ka huat phah thluh. Ka ui tuk” a ti.

Leave a Reply

Your email address will not be published. Required fields are marked *