Covid 19 pianhmangthleng Omicron kan hmu saal an ti

Ramleng ihsin Myanmar ah luttu mipum 12 ah Covid pianhmangthleng Omicron kan hmu ti`n ralhraang SAC harhdamzung cun thu an suah.

Kawlrammi mipum 11 le ramdangmi 1 pawl an si tiah tarlang a si ih, cupawlcu bawmawknak vanzam (Relief Flight) thawn UAE ihsin raluttu le Malaysia, India ram pawl ihsin a ratu pawl an si tiah thusuahmi ah an ngan tel.

“Covid natnak neitu lak ihsin pianhmangthleng Omicron rinhleh mina 22 an um ih ralkap siizung ah ceekfelbet a si tikah mipum 12 pawl in natnak an nei mi hmuhsuah a si” tiah SAC Ministry of Health zung in thu an suah ih “an mah pawl vanzam topitu zaten quarantine lutter an si” tiah an tarlang.

SAC Ralhraang cun December 28 khalah ramsung ah Covid pianhmangthleng Omicron nat neitu mi 4 an um tiah thu an suah nan, an dam thluh ruangah kan tlungter saal ti`n cuih ni thotho ah thu an suah tiah theih a si.

Leave a Reply

Your email address will not be published. Required fields are marked *