Chinram hriamkaibu thawn pehpar mi thu ah Mandalay ih Doctor 14 pawl licence phit sak

Mandalay bulpak siizung ih hnaṭuan Doctor 14 pawl cu Mandalay Division Commander hohanak thawn March 13 ih tuah mi ralhraang meeting thusuak vekin Doctor sinak Licence pawl an phit/lak sak tiah theih a si.

Penghuap bulpak siizung thawn pehparmi meeting cu Ralbawi Ko Ko Oo (အလယ်ပိုင်းတိုင်း စစ်ဌာနချုပ်တိုင်းမှူး ဗိုလ်ချုပ်ကိုကိုဦး) le Harhdamzung ṭuanvonei Dr. Win Naing hohanak thawn Mandalay ralhraang zung ah an tuah mi a si.

Meeting thawn pehparmi sunglamthu pholangtu mipakhat cun “Mindat le Chinram ih an kai mi siivai le bungrua pawl cu Mandalay bulpak siizung 3-4 pawl thawn pehparnak an nei tiah an rel. Cun, tuṭum hi ralrin kan pe netabik siseh ti`n an rel” a ti.

(Hmaizarh ihsin thok bulpak siizung ih tuamhlawmmi mina hmin cazin siseh, an nat nak tivek tiang ralhraang zung ah report pek dingin thu an pe cih tiah theih a si.)

CDM tuahtu Doctor hohami pawlkom pawl in mipi humhimtu ralkap pawl training an pe thu khal an rel tiah amahcun a relbet hrih.

Cuihtlunah Licence phitsakmi Doctor pawl hnaṭuannak bulpak siizung pawl khal cu khar sak an si ding thu ralbawi Ko Ko Oo in a rel tiah a ti.

Licence phitsakmi Doctor pawl ih hmin cazin cipciar cu an him nak ding hrang ruatin kan tarlang lo ding tiah MS thuthang in a tarlang a si.

Leave a Reply

Your email address will not be published. Required fields are marked *